ഡിസൈനില്‍ പുതുമയും, കൂടുതല്‍ ഫീച്ചര്‍ സമ്പന്നമായതുമായ ഹ്യുണ്ടായി അൽകാസർ ഇന്ത്യയിൽ അവതരിപ്പിച്ചു. പുതിയ രൂപത്തിനും ഭാവത്തിനുമൊപ്പം മോഹിപ്പിക്കുന്ന വിലയിലുമാണ് പുതിയ ഹ്യുണ്ടായി അൽകസാർ എത്തുന്നത്.ഹ്യുണ്ടായിയുടെ ഗ്ലോബല്‍ ഡിസൈന്‍ ഐഡന്റിറ്റിയായ സെന്‍ഷ്യല്‍ സ്‌പോര്‍ട്ടിനെസ് അടിസ്ഥാനമാക്കിയാണ് പുതിയ അല്‍കസാറും ഒരുക്കിയിരിക്കുന്നത്. എസ്‌യുവിയുടെ പെട്രോൾ-മാനുവൽ 7-സീറ്റർ ബേസ് വേരിയന്റിന് 14.99 ലക്ഷം രൂപ മുതലാണ് എക്സ്ഷോറൂം വില ആരംഭിക്കുന്നത്. ഡീസൽ എൻട്രി ലെവൽ എക്‌സിക്യൂട്ടീവ് ട്രിമ്മിന് 15.99 ലക്ഷം രൂപയും എക്സ്ഷോറൂം വിലയായി മുടക്കേണ്ടി വരും.

വാഹനങ്ങളിലെ സാങ്കേതികവിദ്യയില്‍ മുന്‍പന്തിയിലാണ് ഹ്യുണ്ടായിയുടെ സ്ഥാനമെന്ന് അല്‍കസാറിലൂടെ തെളിയിക്കാനുള്ള ശ്രമവും നടത്തിയിട്ടുണ്ട്. മഹീന്ദ്ര സ്കോർപിയോ-എൻ, ടാറ്റ സഫാരി, എംജി ഹെക്ടർ പ്ലസ് എന്നീ വാഹനങ്ങളാണ് വിപണിയിലെ അൽകാസറിന്റെ എതിരാളികൾ. ഹ്യുണ്ടായിയുടെ പ്രീമിയം 6,7 സീറ്റർ എസ്‌യുവിയാണ് അൽകാസർ. എക്സിക്യൂട്ടീവ്, പ്രസ്റ്റീജ്, പ്ലാറ്റിനം, സിഗ്നേച്ചർ എന്നീ നാല് വേരിയൻ്റുകളിലാണ് വാഹനം നിരത്തിലേക്കെത്തുക. “മാറിക്കൊണ്ടിരിക്കുന്ന ഉപഭോക്തൃ ആവശ്യങ്ങൾ അവരുടെ പ്രതീക്ഷകൾക്കപ്പുറമുള്ള രീതിയിൽ വികസിപ്പിച്ചെടുക്കുന്നതിൽ ഞങ്ങൾ പ്രതിജ്ഞാബദ്ധരാണ്. എസ്‌യുവി സെഗ്‌മെൻ്റിൽ സൗകര്യം വർദ്ധിപ്പിക്കുന്ന ബുദ്ധിപരവും വൈവിധ്യമാർന്നതുമായ എസ്‌യുവി അവതരിപ്പിക്കുന്നതിൽ ഞങ്ങൾ സന്തുഷ്ടരാണ് ”ഹ്യുണ്ടായ് മോട്ടോർ ഇന്ത്യ മാനേജിംഗ് ഡയറക്ടർ അൻസൂ കിം പറഞ്ഞു.

റോബസ്റ്റ് എമറാൾഡ് മാറ്റ് (പുതിയത്), ടൈറ്റൻ ഗ്രേ മാറ്റ്, റോബസ്റ്റ് എമറാൾഡ്, സ്റ്റാറി നൈറ്റ്, റേഞ്ചർ കാഖി, ഫിയറി റെഡ്, അബിസ് ബ്ലാക്ക്, അറ്റ്‌ലസ് വൈറ്റ്, ബ്ലാക്ക് റൂഫുള്ള അറ്റ്‌ലസ് വൈറ്റ് എന്നിങ്ങനെ ഒമ്പത് എക്സ്റ്റീരിയർ കളർ ഓപ്ഷനുകളാണ് എസ്‌യുവിക്ക് ലഭിക്കുന്നത്. അൽകാസർ പുതിയ ഡാർക്ക് ക്രോം ഗ്രില്ലും പുതിയ ക്വാഡ്-ബീം എൽഇഡി ഹെഡ്‌ലാമ്പുകളും H- ആകൃതിയിലുള്ള LED DRLഉം സജ്ജീകരിച്ചിരിക്കുന്നു. അൽകാസർ ഫെയ്‌സ്‌ലിഫ്റ്റിൻ്റെ ക്യാബിൻ ഡ്യുവൽ-ടോൺ കളർ തീമിലാണ് അവതരിപ്പിച്ചിരിക്കുന്നത്. ക്രെറ്റ ഫെയ്‌സ്‌ലിഫ്റ്റിന് സമാനമായി, അൽകാസർ ഫെയ്‌സ്‌ലിഫ്റ്റിൽ 10.25 ഇഞ്ച് ഇൻഫോടെയ്ൻമെൻ്റും 10.25 ഇഞ്ച് ഇൻസ്ട്രുമെൻ്റ് ക്ലസ്റ്റർ സ്‌ക്രീനുകളും സംയോജിപ്പിച്ചിരിക്കുന്നു.

കൂടാതെ, എസ്‌യുവിക്ക് 8-സ്പീക്കർ ബോസ് പ്രീമിയം സൗണ്ട് സിസ്റ്റം, വയർലെസ് ചാർജർ, മാഗ്നറ്റിക് പാഡ്, വോയ്‌സ് പനോരമിക് സൺറൂഫ്, 10 പ്രാദേശിക ഭാഷകളിലും രണ്ട് അന്തർദേശീയ ഭാഷകളുള്ള മൾട്ടി-ലാംഗ്വേജ് യുഐ പിന്തുണയും വാഹനത്തിന്റെ സവിശേഷതകളാണ്. ഹ്യുണ്ടായിയുടെ പോർട്ട്‌ഫോളിയോയിലെ എൻഎഫ്‌സി സാങ്കേതികവിദ്യയുള്ള ഡിജിറ്റൽ കീ എത്തുന്ന ആദ്യ മോഡലാണ് അൽകാസർ 2024. ഈ സംവിധാനം വഴി ഡ്രൈവർക്ക് സ്‌മാർട്ട്‌ഫോണോ സ്മാർട്ട് വാച്ചോ ഉപയോഗിച്ച് ഡോർ ഹാൻഡിൽ സ്‌പർശിച്ച് എസ്‌യുവി ലോക്ക് ചെയ്യാനും അൺലോക്ക് ചെയ്യാനും കഴിയും.

ആറ് എയർബാഗുകൾ, ഹിൽ-സ്റ്റാർട്ട് അസിസ്റ്റ് കൺട്രോൾ, ഇലക്ട്രോണിക് സ്റ്റെബിലിറ്റി കൺട്രോൾ, വെഹിക്കിൾ സ്റ്റെബിലിറ്റി മാനേജ്‌മെൻ്റ്, നാല് ഡിസ്‌ക് ബ്രേക്കുകൾ, ടയർ പ്രഷർ മോണിറ്ററിംഗ് സിസ്റ്റം (ഹൈലൈൻ) എന്നിവയുൾപ്പെടെ 40 ഫീച്ചറുകളാണ് സുരക്ഷ സംവിധാനങ്ങളായി അൽകാസർ എത്തുന്നത്.സുരക്ഷയെക്കുറിച്ച് പറയുകയാണെങ്കിൽ, അൽകാസറിന് ഉള്ളത്. കൂടാതെ, നിങ്ങൾക്ക് ഹിൽ ഡിസൻ്റ് കൺട്രോൾ, ഫ്രണ്ട് പാർക്കിംഗ് സെൻസറുകൾ, റെയിൻ സെൻസിംഗ് വൈപ്പറുകൾ, ഇലക്ട്രോക്രോമിക് ഐആർവിഎം എന്നിവ ലഭിക്കും. സ്മാർട്ട് ക്രൂയിസ് കൺട്രോൾ, സറൗണ്ട് വ്യൂ മോണിറ്റർ, ബ്ലൈൻഡ് സ്‌പോട്ട് വ്യൂ മോണിറ്റർ, ഫോർവേഡ് കൊളിസൺ വാണിംഗ് ആൻഡ് എവേവൻസ് അസിസ്റ്റ്, ലെയ്ൻ കീപ്പ് അസിസ്റ്റ്, ഡ്രൈവർ അറ്റൻഷൻ വാണിംഗ് എന്നിവ ഉൾപ്പെടെ 70 സുരക്ഷാ ഫീച്ചറുകളാണ് അൽകാസർ വാ​ഗ്ദാനം ചെയ്യുന്നത്.