"തായ്‌ലൻഡിലെ രാജകുടുംബത്തിൽ വീണ്ടും പിന്തുടർച്ചാവകാശത്തെച്ചൊല്ലിയുള്ള ചർച്ചകൾ സജീവമാകുന്നു. ലോകത്തിലെ ഏറ്റവും സമ്പന്നനായ, രാമ പത്താമൻ രാജാവിന്റെ പുറത്താക്കപ്പെട്ട മക്കളിൽ ഒരാളായ വചരേസോൺ വിചാരവോങ്‌സെ ബുദ്ധസന്യാസിയായി ദീക്ഷ സ്വീകരിച്ചതാണ് പുതിയ വാർത്തകൾക്ക് കാരണം. ബുദ്ധമതത്തിലെ ഏറ്റവും പവിത്രമായ വെസക് ദിനത്തിൽ ബാങ്കോക്കിൽ വെച്ചായിരുന്നു ചടങ്ങുകൾ. 1996-ൽ നാടുകടത്തപ്പെട്ട അദ്ദേഹം 2023-ൽ തായ്‌ലൻഡിൽ തിരിച്ചെത്തിയിരുന്നു. ഈ സന്യാസ സ്വീകരണം ഒരു രാജകീയ തിരിച്ചുവരവിന്റെ സൂചനയാണോ? ആരാകും എഴുപത് പിന്നിട്ട രാജാവിന്റെ പിൻഗാമി?"
ആരാണ് വചരേസോൺ വിചാരവോങ്‌സെ?
"താൻ ഔൻ എന്ന് പൊതുവെ അറിയപ്പെടുന്ന വചരേസോൺ വിചാരവോങ്‌സെ, തായ്‌ലൻഡിലെ മഹാ വജിറലോങ്കോൺ രാജാവിന്റെ (രാമ പത്താമൻ) രണ്ടാമത്തെ മകനാണ്.
രാമ പത്താമൻ്റെ മുൻ ഭാര്യയും നടിയുമായിരുന്ന സുജരിനീ വിവാചാരവോങ്‌സെയാണ് (മുമ്പ് യുവധിദ പോൾപ്രസെർത്ത്) അദ്ദേഹത്തിന്റെ അമ്മ.
1981-ൽ ജനിച്ച വചരേസോൺ, സുജരിനിയുടെ അഞ്ച് മക്കളിൽ രണ്ടാമനാണ്.
1996-ൽ അമ്മയ്ക്കും മൂന്ന് സഹോദരന്മാർക്കുമൊപ്പം രാജകുടുംബത്തിൽ നിന്ന് പുറത്താക്കപ്പെട്ട ശേഷം അമേരിക്കയിലാണ് അദ്ദേഹം വളർന്നത്.
വിദേശത്ത് സാധാരണക്കാരനായി ജീവിച്ചെങ്കിലും, തായ് സമൂഹവുമായി അദ്ദേഹം ബന്ധം പുലർത്തിയിരുന്നു.
2023-ൽ അപ്രതീക്ഷിതമായി തായ്‌ലൻഡിൽ തിരിച്ചെത്തിയതിന് ശേഷം പൊതുചടങ്ങുകളിൽ അദ്ദേഹം സജീവമായി പങ്കെടുക്കുന്നുണ്ട്.
ഇപ്പോൾ, അദ്ദേഹത്തിന്റെ സന്യാസ സ്വീകരണം ഒരു രാജകീയ തിരിച്ചുവരവിന് തയ്യാറെടുക്കുകയാണെന്ന അഭ്യൂഹങ്ങൾക്ക് ശക്തി പകർന്നിരിക്കുകയാണ്.
ചില റിപ്പോർട്ടുകൾ അനുസരിച്ച്, പിതാവിന്റെ പ്രീതി വീണ്ടെടുക്കാനുള്ള ശ്രമത്തിന്റെ ഭാഗമായാണ് വചരേസോണിന്റെ ബാങ്കോക്കിലേക്കുള്ള മടക്കം.
തായ്‌ലൻഡിലെ രാജഭരണം:
രാജവാഴ്ച നിലനിൽക്കുന്ന രാജ്യമാണ് തായ്‌ലാൻഡ്. രാജാവാണ് രാഷ്ട്രത്തലവൻ; പക്ഷേ പ്രധാനമന്ത്രിയാണ് ഭരണതലവൻ. തായ്‌ലാന്‍ഡിലെ രാജാവ് രാഷ്ട്രത്തലവന് പുറമേ ചക്രി രാജവംശത്തിന്റെ തലവനുമാണ്. റോയല്‍ തായ് സായുധ സേനയുടെ പരമോന്നത കമാന്‍ഡറും അദ്ദേഹമാണ്. 1932-ല്‍ സൈന്യത്തിന്റെ നേതൃത്വത്തില്‍ നടന്ന രക്തരഹിത അട്ടിമറിയിലൂടെ തായ്‌ലാന്‍ഡിലെ രാജാവായ രാമ ഏഴാമന്റെ സമ്പൂര്‍ണ്ണ അധികാരങ്ങള്‍ നീക്കം ചെയ്തെങ്കിലും രാജാവിന് ഇപ്പോഴും വലിയ സ്വാധീനമാണുള്ളത്. രാജ്യത്ത് എല്ലായിടത്തും രാജാവിന്റെ പ്രാധാന്യം പ്രകടമാണ്. രാജാവിന് പരമ്പരാഗതമായി ദൈവതുല്യമായ ഒരു പദവി തായ് ജനങ്ങള്‍ക്കിടയിലുണ്ട്. തായ് പതാകയുടെ നീല വരയാണ് രാജവാഴ്ചയെ പ്രതിനിധീകരിക്കുന്നത്.
ചുവപ്പ് രാഷ്ട്രത്തെയും വെള്ള മതത്തെയും സൂചിപ്പിക്കുന്നു. പതിമൂന്നാം നൂറ്റാണ്ടിന്റെ തുടക്കത്തില്‍ സ്ഥാപിതമായ സുഖോത്തായ് ആണ് പൊതുവില്‍ ആദ്യത്തെ സ്വതന്ത്രതായ് രാജ്യമായി കണക്കാക്കുന്നത്. നിലവില്‍ അധികാരം കൈയാളുന്ന ചക്രി രാജവംശം 1782-ലാണ് സ്ഥാപിതമാകുന്നത്. ബുദ്ധ യൊദ്ഫ ചൂലലൊകെ അഥവ രാമ ഒന്നാമനാണ് ഈ രാജവംശത്തിന്റെ സ്ഥാപകന്‍. ഈ കുടുംബത്തിന്റെ തലവനാണ് അതാത് കാലങ്ങളില്‍ രാജാവാകുക. മഹാവിഷ്ണുവിന്റെ ഭൂമിയിലെ പ്രതിപുരുഷനായാണ് ചക്രി രാജാക്കന്മാരെ കരുതുന്നത്.
ആരാണ് രാമ പത്താമൻ രാജാവ്? ലോകത്തിലെ ഏറ്റവും ധനിക രാജാവ്
ഇപ്പോൾ 72 വയസ്സുള്ള മഹാ വജിറലോങ്കോൺ രാജാവ്, പിതാവ് ഭൂമിബോൽ അതുല്യതേജ് രാജാവിന്റെ 70 വർഷത്തിലേറെ നീണ്ട ഭരണത്തിനുശേഷം 2016-ലാണ് തായ് സിംഹാസനത്തിലെത്തിയത്. രാമ പത്താമൻ എന്ന് ഔദ്യോഗികമായി അറിയപ്പെടുന്ന അദ്ദേഹത്തിന്റെ വ്യക്തിജീവിതം സംഭവബഹുലവും ഭരണം പലപ്പോഴും വിവാദപരവുമായിരുന്നു. കൂടുതലും ജർമ്മനിയിൽ നിന്നാണ് അദ്ദേഹം ഭരണം നടത്തിയിരുന്നത്. ലോകത്തിലെ ഏറ്റവും ധനികനായ രാജാവാണ് ഇദ്ദേഹം! ഏകദേശം 3.7 ലക്ഷം കോടി രൂപ (43 ബില്യൺ യു.എസ്. ഡോളർ) ആസ്തിയുള്ളതായി കണക്കാക്കുന്നു. പാരമ്പര്യ സ്വത്തുക്കൾക്ക് പുറമേ വിപുലമായ നിക്ഷേപങ്ങളില്‍ നിന്നുമുള്ളതാണ് വരുമാനം.
ഭൂമിബോല്‍ അതുല്യതേജ് രാജാവിന്റെയും സിരികിറ്റ് രാജ്ഞിയുടേയും രണ്ടാമത്തെ കുട്ടിയായി 1952 ജൂലായ് 28-നാണ് മഹാ വജിറലോങ്കോണ്‍ ജനിക്കുന്നത്. ബാങ്കോക്കിലും പിന്നീട് യു.കെ, ഓസ്ട്രേലിയ എന്നിവിടങ്ങളിലും വിദ്യാഭ്യാസം നേടിയ അദ്ദേഹം കാന്‍ബറയിലെ റോയല്‍ മിലിട്ടറി കോളേജില്‍ പരിശീലനം നേടി. തായ്‌ലാൻഡ്, യു.കെ., യു.എസ്., ഓസ്ട്രേലിയ എന്നിവിടങ്ങളില്‍ വിപുലമായ സൈനിക പരിശീലനം നടത്തിയിട്ടുണ്ട്. 1972-ല്‍ പിതാവ് അദ്ദേഹത്തിന് കിരീടാവകാശി എന്ന പദവി ഔപചാരികമായി നല്‍കി."
നാല് വിവാഹം, ഏഴ് കുട്ടികൾ, സങ്കീർണ്ണമായ കുടുംബ ചരിത്രം
രാമ പത്താമൻ നാല് തവണ വിവാഹിതനായി.
കസിനായ സോംസവാലി രാജകുമാരിയെ 1977-ൽ വിവാഹം കഴിച്ചു. 1978-ൽ ബജ്രകിതിയഭ രാജകുമാരി ജനിച്ചു.
പിന്നീട് യുവധിദ എന്ന നടിയുമായി പ്രണയത്തിലായി. 1970-കളുടെ അവസാനത്തിൽ അവർ ഒരുമിച്ച് താമസമാരംഭിച്ചു. 1987-നകം നാല് ആൺമക്കളും (വചരേസോൺ ഉൾപ്പെടെ) ഒരു മകളും (സിരിവണ്ണാവരി) ജനിച്ചു. സോംസവലിയുമായി 1993-ൽ വിവാഹമോചനം നേടിയ ശേഷമാണ് യുവധിദയെ വിവാഹം കഴിച്ചത്. വിവാഹശേഷം അവർ സുജരിനീ വിവാചാരവോങ്സെ എന്ന് പേര് മാറ്റി, റോയല്‍ തായ് ആര്‍മിയില്‍ മേജറായി.
എന്നാൽ 1996-ൽ സുജരിനീയെ വ്യഭിചാരം ആരോപിച്ച് രാജാവ് തള്ളിപ്പറയുകയും അവരുടെയും അഞ്ച് കുട്ടികളുടെയും രാജകീയ പദവികൾ എടുത്തുകളയുകയും ചെയ്തു. സുജരിനീയും കുട്ടികളും ഇംഗ്ലണ്ടിലേക്ക് പലായനം ചെയ്തു. മകൾ സിരിവണ്ണാവരിക്ക് മാത്രം പിന്നീട് തായ്‌ലൻഡിലേക്ക് മടങ്ങാൻ അനുവാദം ലഭിക്കുകയും 2005-ൽ രാജകുമാരി പദവി പുനഃസ്ഥാപിക്കുകയും ചെയ്തു. ആൺമക്കൾ അമേരിക്കയിലേക്ക് താമസം മാറ്റി.
2001-ൽ സാധാരണക്കാരിയായ ശ്രീരശ്മി സുവാദിയെ വിവാഹം കഴിച്ചു. 2005-ൽ അവർക്ക് ദിപാങ്കോൺ എന്ന മകൻ ജനിച്ചു. ശ്രീരശ്മിക്ക് രാജ്ഞി പദവിയും മകന് രാജകുമാരൻ പദവിയും ലഭിച്ചു. എന്നാൽ 2014-ൽ ശ്രീരശ്മിയുടെ ബന്ധുക്കൾക്കെതിരായ അഴിമതി ആരോപണങ്ങളെ തുടർന്ന് അവർ രാജകീയ പദവികൾ ഉപേക്ഷിച്ച് വിവാഹമോചനം നേടി.
2019 മേയിൽ, കിരീടധാരണത്തിന് ദിവസങ്ങൾക്ക് മുൻപ്, മുൻ ഫ്ലൈറ്റ് അറ്റൻഡന്റായ സുതിദയെ വിവാഹം കഴിച്ചു. അവരാണ് ഇപ്പോഴത്തെ രാജ്ഞി. ഇവർക്ക് കുട്ടികളില്ല. കൂടാതെ, അദ്ദേഹത്തിന് സിനീനാത് വോങ്‌വജിരപക്‌ഡി എന്നൊരു രാജകീയ വെപ്പാട്ടിയുമുണ്ട്. അവരുടെ പദവി ഒരിക്കൽ എടുത്തുകളഞ്ഞെങ്കിലും പിന്നീട് പുനഃസ്ഥാപിച്ചു.
തായ്‌ലൻഡിലെ സിംഹാസനത്തിന്റെ അടുത്ത അവകാശിയെ സംബന്ധിച്ച് കടുത്ത അനിശ്ചിതത്വം നിലനിൽക്കുകയാണ്. രാമ പത്താമൻ ഔദ്യോഗികമായി ഇതുവരെ ഒരു അവകാശിയെ പ്രഖ്യാപിച്ചിട്ടില്ല. 1924-ലെ കൊട്ടാര പിന്തുടര്‍ച്ചാവകാശ നിയമപ്രകാരം സിംഹാസനം രാജാവിന്റെ മൂത്ത മകനിലേക്കും, മകനില്ലെങ്കില്‍ മൂത്ത ചെറുമകനിലേക്കുമാണ് പോകേണ്ടത്. അനുയോജ്യനായ പുരുഷ പിന്‍ഗാമി ഇല്ലെങ്കില്‍, സിംഹാസനം ഒരു മകള്‍ക്കോ, ചെറുമകള്‍ക്കോ കൈമാറാവുന്നതാണ്. ഇതിന് പുറമേ ചക്രി രാജവംശത്തില്‍ നിന്നുള്ള അനുയോജ്യനായ ഏതൊരു പുരുഷ പിന്‍ഗാമിയെയും തന്റെ പിന്‍ഗാമിയായി നിയമിക്കാന്‍ രാജാവിന് അധികാരമുണ്ട്. 1974-ലെ ഭരണഘടനാ ഭേദഗതി പ്രകാരം പുരുഷ അവകാശികളുടെ അഭാവത്തിൽ ഒരു മകൾക്ക് പിന്തുടർച്ചാവകാശം അംഗീകരിക്കാം.
എന്നാൽ, രാമ പത്താമൻ രാജാവിന്റെ ഔദ്യോഗികമായി അംഗീകരിക്കപ്പെട്ട ഏക മകനായ ദിപാങ്കോൺ രാജകുമാരന് (2005-ൽ ജനനം), ഭരണം നടത്താനുള്ള കഴിവിനെ ബാധിച്ചേക്കാവുന്ന ഒരു പ്രത്യേക ആരോഗ്യസ്ഥിതിയുണ്ടെന്ന് വിശ്വസിക്കപ്പെടുന്നു. അതേസമയം, വചരേസോൺ ഉൾപ്പെടെയുള്ള രാമ പത്താമന്റെ മറ്റ് മിക്ക ആൺമക്കളുടെയും രാജകീയ പദവികൾ 1996-ൽ എടുത്തുകളഞ്ഞിരുന്നു.ആദ്യ വിവാഹത്തിലെ അദ്ദേഹത്തിന്റെ മൂത്ത മകളായ ബജ്രകിതിയഭ രാജകുമാരിയെ ഒരുകാലത്ത് കിരീടാവകാശിയായി കണ്ടിരുന്നു.
എന്നാൽ, 2022 ഡിസംബറില്‍ ഹൃദയാഘാതം വന്ന് കോമയിലായതിനാല്‍ അവരുടെ നിലവിലെ സ്ഥിതി അനിശ്ചിതത്വത്തിലാണ്. രാജാവിന്റെ മറ്റൊരു മകളായ സിരിവണ്ണാവരി രാജകുമാരി തായ്‌ലൻഡിൽ താമസിക്കുന്നു, അവർക്ക് രാജകീയ പദവിയുണ്ടെങ്കിലും നിലവിൽ ഔദ്യോഗിക പിന്തുടർച്ചാ നിരയിലില്ല.
പുറത്താക്കപ്പെട്ടിട്ടും എന്തുകൊണ്ട് വചരേസോൺ വാർത്തകളിൽ നിറയുന്നു?
ഏകദേശം മൂന്ന് പതിറ്റാണ്ട് മുമ്പ് വചരേസോണിനെ ഔദ്യോഗികമായി രാജകുടുംബത്തിൽ നിന്ന് പുറത്താക്കിയെങ്കിലും, അദ്ദേഹത്തിന്റെ സമീപകാല പ്രവർത്തനങ്ങൾ ഒരു നിശബ്ദമായ തിരിച്ചുവരവിനെ സൂചിപ്പിക്കുന്നു. തായ്‌ലൻഡിൽ, രാജകുടുംബത്തിലെ പുരുഷന്മാർ പൊതു ചുമതലകൾ ഏറ്റെടുക്കുന്നതിന് മുമ്പ് ഒരു സന്യാസാശ്രമത്തിൽ കുറച്ചുകാലം ചെലവഴിക്കുന്നത് പതിവാണ്. അദ്ദേഹത്തിന്റെ സന്യാസ സ്വീകരണം, കിരീടിവകാശിയായി മാറുന്നതിൻ്റെ സൂചനയായി പല നിരീക്ഷകരും കാണുന്നു.
സോഷ്യൽ മീഡിയയിൽ പിതാവിനെക്കുറിച്ചുള്ള അദ്ദേഹത്തിന്റെ പരസ്യമായ പ്രശംസയും, പ്രധാനപ്പെട്ട സാംസ്കാരികവും മതപരവുമായ നിമിഷങ്ങളിലെ അദ്ദേഹത്തിന്റെ ശ്രദ്ധേയമായ തിരിച്ചുവരവും, അദ്ദേഹം രാജകുടുംബത്തിലേക്ക് വീണ്ടും പ്രവേശിക്കുകയാണെന്നും - ഒരുപക്ഷേ സിംഹാസനത്തിനായുള്ള ഒരു മത്സരാർത്ഥിയായി പോലും - സൂചിപ്പിക്കുന്നു."
വചരേസോൺ വിചാരവോങ്‌സെയുടെ സന്യാസ സ്വീകരണത്തോടെ, തായ്‌ലൻഡ് രാജകുടുംബത്തിലെ പിന്തുടർച്ചാവകാശത്തെക്കുറിച്ചുള്ള ചർച്ചകൾക്ക് വീണ്ടും ചൂടുപിടിച്ചിരിക്കുകയാണ്. ലോകത്തിലെ ഏറ്റവും ധനികനായ രാജാവിന്റെ പുറത്താക്കപ്പെട്ട മകൻ സിംഹാസനത്തിലേക്ക് എത്തുമോ? ഭാവിയിൽ ആരായിരിക്കും തായ്‌ലൻഡിന്റെ അടുത്ത രാജാവെന്ന ചോദ്യം ഇപ്പോൾ കൂടുതൽ സങ്കീർണ്ണമായിരിക്കുന്നു. ഈ നീക്കങ്ങൾ ഒരു പുതിയ തുടക്കത്തിന്റെ സൂചനയാണോ അതോ നിലവിലെ രാഷ്ട്രീയ നാടകങ്ങളിലെ മറ്റൊരു അധ്യായം മാത്രമാണോ എന്ന് കാലം തെളിയിക്കും.
