29 വർഷങ്ങൾക്ക് മുൻപ് നടന്ന ഒതായി മനാഫ് വധക്കേസിൽ വിധി പ്രസ്താവിച്ചു. കേസിലെ ഒന്നാം പ്രതി മാലങ്ങാടൻ ഷഫീഖ് കുറ്റക്കാരനാണെന്ന് മഞ്ചേരി അഡീഷണൽ ജില്ലാ സെഷൻസ് കോടതി കണ്ടെത്തി. അതേസമയം, കേസിൽ പ്രതികളായിരുന്ന മറ്റ് മൂന്ന് പേരെ കോടതി വെറുതെ വിട്ടു.
1995 ഏപ്രിൽ 13-ന് ഒതായി അങ്ങാടിയിൽ വെച്ചാണ് ഓട്ടോ ഡ്രൈവറായ മനാഫിനെ അതിക്രൂരമായി കൊലപ്പെടുത്തിയത്. മനാഫിനെ അടിച്ചും കുത്തിയും കൊലപ്പെടുത്തുകയായിരുന്നുവെന്നാണ് കേസ്. 25 വർഷത്തോളം ഒളിവിൽ കഴിഞ്ഞ പ്രതികളെ മനാഫിന്റെ സഹോദരൻ അബ്ദുൽ റസാഖ് നടത്തിയ നിയമ പോരാട്ടത്തിനൊടുവിലാണ് നിയമത്തിന് മുന്നിൽ കൊണ്ടുവന്നത്.
ആകെ 26 പ്രതികളുണ്ടായിരുന്ന കേസിൽ മുൻ എം.എൽ.എ പി.വി. അൻവർ ഉൾപ്പെടെ 21 പേരെ കോടതി നേരത്തെ വെറുതെ വിട്ടിരുന്നു. പി.വി. അൻവറിന്റെ സഹോദരി പുത്രന്മാരടക്കം നാല് പേരായിരുന്നു വിധി പ്രസ്താവിക്കുമ്പോൾ പ്രതിപ്പട്ടികയിൽ ഉണ്ടായിരുന്നത്. ഇതിൽ മാലങ്ങാടൻ ഷഫീഖ് കുറ്റക്കാരനാണെന്ന് കോടതി കണ്ടെത്തി. മൂന്നാം പ്രതി മാലങ്ങാടൻ ഷെരീഫ്, 17-ാം പ്രതി നിലമ്പൂർ സ്വദേശി മുനീബ്, 19-ാം പ്രതി കബീർ എന്ന ജാബിർ എന്നിവരെയാണ് വെറുതെ വിട്ടത്. ഷഫീഖിനുള്ള ശിക്ഷ കോടതി പിന്നീട് വിധിക്കും.
