ഒതായി മനാഫ് വധക്കേസിലെ ഒന്നാം പ്രതി മാലങ്ങാടൻ ഷഫീഖിന് ജീവപര്യന്തം തടവ് ശിക്ഷയും ഒരു ലക്ഷം രൂപ പിഴയും വിധിച്ചു. മഞ്ചേരി അഡീഷണൽ ജില്ലാ സെഷൻസ് കോടതി ജഡ്ജി എ.വി. ടെല്ലസാണ് വിധി പ്രഖ്യാപിച്ചത്. കേസിൽ കുറ്റക്കാരനാണെന്ന് ഇന്നലെ കോടതി കണ്ടെത്തിയിരുന്നു.
പി.വി. അൻവർ എംഎൽഎയുടെ സഹോദരി പുത്രനായ മാലങ്ങാടൻ ഷഫീഖ് ഉൾപ്പെടെ നാല് പ്രതികളാണ് വിചാരണ നേരിട്ടത്. ഇതിൽ സഹോദരൻ ഷെരീഫ് ഉൾപ്പെടെയുള്ള മറ്റ് മൂന്ന് പ്രതികളെ കോടതി വെറുതെ വിട്ടിരുന്നു. ഇതിനെതിരെ അപ്പീൽ നൽകുമെന്ന് മനാഫിന്റെ കുടുംബം വ്യക്തമാക്കിയിട്ടുണ്ട്.
1995 ഏപ്രിൽ 13-നാണ് എടവണ്ണ ഒതായി അങ്ങാടിയിൽ വച്ച് ഓട്ടോ ഡ്രൈവറായിരുന്ന മനാഫിനെ കുത്തിക്കൊലപ്പെടുത്തിയത്. നീണ്ട 30 വർഷത്തെ നിയമപോരാട്ടത്തിനൊടുവിലാണ് കേസിൽ വിധി വരുന്നത്. രാഷ്ട്രീയ പ്രേരിതമായ കൊലപാതകമെന്നാണ് അന്ന് ആരോപണം ഉയർന്നിരുന്നത്. കൊലപാതകത്തിന് പിന്നിൽ പ്രവർത്തിച്ചവർക്കെതിരെ ശക്തമായ നിയമനടപടി സ്വീകരിക്കണമെന്നാണ് മനാഫിന്റെ കുടുംബത്തിന്റെ ആവശ്യം.
