ഐഎസ്ആര്‍ഒയുടെ നാവിഗേഷന്‍ ഉപഗ്രഹമായ എന്‍വിഎസ്-03 ലക്ഷ്യസ്ഥാനത്തെത്തി. ഉപഗ്രഹം ഭൂസ്ഥിര ഭ്രമണപഥത്തിലേക്ക് എത്തിക്കുന്ന അവസാന ഭ്രമണ പഥമാറ്റവും പൂര്‍ത്തിയായതായി ഐഎസ്ആര്‍ഓ വ്യക്തമാക്കി. ഇന്ത്യയുടെ തദ്ദേശീയ നാവിഗേഷന്‍ സംവിധാനമായ 'നാവിക്' നേരിട്ടിരുന്ന സാങ്കേതിക പ്രതിസന്ധികള്‍ക്ക് ഇതോടെ പൂര്‍ണ്ണ പരിഹാരമാകും. നാവിക് ശൃംഖല പ്രവര്‍ത്തനസജ്ജമാകാന്‍ കുറഞ്ഞത് നാല് ഉപഗ്രഹങ്ങളെങ്കിലും ആവശ്യമാണ്. എന്‍വിഎസ്-03 കൂടി ഭ്രമണപഥത്തില്‍ എത്തുന്നതോടെ നിലവില്‍ നാവികിലുള്ള കുറവ് നികത്തപ്പെടും. പൂര്‍ണ്ണമായും തദ്ദേശീയമായി നിര്‍മ്മിച്ച ആറ്റോമിക് ക്ലോക്കും അത്യാധുനിക നാവിഗേഷന്‍ പേലോഡുകളുമാണ് ഈ ഉപഗ്രഹത്തിന്റെ പ്രധാന സവിശേഷത. വരും ദിവസങ്ങളില്‍ കമ്മീഷനിങ് നടപടികള്‍ കൂടി പൂര്‍ത്തിയാകുന്നതോടെ, രാജ്യത്തിന്റെ പ്രതിരോധ ആവശ്യങ്ങള്‍ക്കും സാധാരണക്കാരുടെ ആവശ്യങ്ങള്‍ക്കും ഒരുപോലെ പ്രയോജനപ്പെടുന്ന രീതിയില്‍ നാവിക് സംവിധാനം കൂടുതല്‍ കരുത്താര്‍ജ്ജിക്കും.
