നമ്മൾ ഗൂഗിളിൽ എന്തെങ്കിലും തിരയുമ്പോൾ ഇപ്പോൾ ആദ്യം വരുന്നത് AI നൽകുന്ന ഒരു മറുപടിയാണ്, അല്ലേ?
AI ഓവർവ്യൂ! ഒറ്റനോട്ടത്തിൽ കാര്യങ്ങൾ മനസ്സിലാക്കാം, സമയം ലാഭം, അധ്വാനം കുറവ്. എന്തു നല്ല സൗകര്യം!എന്നാൽ ഈ എളുപ്പത്തിൽ കിട്ടുന്ന ഉത്തരത്തിന് വലിയ വില കൊടുക്കേണ്ടി വരുന്നുണ്ടെന്ന് നിങ്ങൾ ചിന്തിച്ചിട്ടുണ്ടോ? ആ വില നൽകുന്നത് നമ്മളല്ല, നമ്മുടെ ഭൂമിയാണ്.
ഓരോ തവണ നമ്മൾ AI ഉപയോഗിച്ച് ഉത്തരം തേടുമ്പോഴും, സാധാരണ ഗൂഗിൾ സെർച്ചിനേക്കാൾ 10 മുതൽ 30 മടങ്ങ് വരെ കൂടുതൽ ഊർജ്ജം ചിലവാകുന്നുണ്ട്. അതായത്, സാധാരണ സെർച്ച് ഏകദേശം 0.2 ഗ്രാം കാർബൺ ഡയോക്സൈഡ് പുറത്തുവിടുമ്പോൾ, ഒരു AI ഉത്തരം 4 മുതൽ 6 ഗ്രാം വരെ കാർബൺ പുറന്തള്ളുന്നു!
ദിവസവും കോടിക്കണക്കിന് ആളുകളാണ് ഗൂഗിളിൽ തിരയുന്നത്. എല്ലാവരുടെയും തിരയലിന് AI മറുപടി നൽകിത്തുടങ്ങിയാൽ, നമ്മുടെ അറിവിനായുള്ള ഈ ദാഹം ഭൂമിയുടെ ശ്വാസം മുട്ടിക്കാൻ അധികം വേണ്ടിവരില്ല.പലപ്പോഴും നമ്മൾ ആവശ്യപ്പെടാതെ തന്നെ ഗൂഗിൾ ഈ AI ഉത്തരങ്ങൾ നൽകുകയാണ്. നമുക്ക് സാധാരണ ലിങ്കുകൾ മതിയെങ്കിലും, ആദ്യം വരുന്നത് ഊർജ്ജം കൂടുതൽ ഉപയോഗിക്കുന്ന ഈ AI മറുപടിയാണ്. ഇത് ശരിക്കും ഒരു സൗകര്യമാണോ, അതോ നമ്മളറിയാതെ നമ്മുടെ മേൽ കെട്ടിവെക്കുന്ന ഒരു ഭാരമാണോ?
ഇതിനൊരു പരിഹാരമില്ലേ? ഉണ്ട്.
ഗൂഗിളിന് വേണമെങ്കിൽ ഉപയോക്താക്കൾക്ക് ഒരു ഓപ്ഷൻ നൽകാം: "നിങ്ങൾക്ക് സാധാരണ സെർച്ച് മതിയോ, അതോ AI ഉത്തരം വേണോ?" എന്ന് ചോദിക്കാം. ഇത് ആളുകളെ അവരുടെ ഡിജിറ്റൽ ശീലങ്ങളെക്കുറിച്ച് ബോധവാന്മാരാക്കും, ഗൂഗിളിൻ്റെ തന്നെ കാർബൺ ഫുഡ് പ്രിൻ്റ് കുറയ്ക്കാനും സഹായിക്കും. എല്ലാ ചോദ്യങ്ങൾക്കും നമുക്ക് AI-യുടെ സംഗ്രഹം ആവശ്യമില്ലല്ലോ.
സാങ്കേതികവിദ്യ മുന്നോട്ട് കുതിക്കുമ്പോൾ, അതിൻ്റെ പാരിസ്ഥിതികമായ വിലയെക്കുറിച്ച് നമ്മൾ മറന്നുപോകരുത്. ഉത്തരം എത്ര വേഗത്തിൽ കിട്ടി എന്നതിനപ്പുറം, ആ ഉത്തരത്തിനായി ഭൂമി എന്ത് വില നൽകി എന്നും നമ്മൾ ചിന്തിക്കണം. ഓരോ ക്ലിക്കിനും ഒരു പാരിസ്ഥിതിക ഉത്തരവാദിത്തമുണ്ട്. അറിവ് നേടാനുള്ള അവകാശം പോലെത്തന്നെ, അത് എന്ത് വിലകൊടുത്ത് വേണം എന്ന് തീരുമാനിക്കാനുള്ള അവകാശവും നമുക്ക് വേണ്ടേ? ചിന്തിക്കുക.
