സയൻസ് ഫിക്ഷൻ സിനിമകളിൽ മാത്രം കണ്ടിരുന്ന പറക്കും കാറുകൾ എന്ന സ്വപ്നം യാഥാർത്ഥ്യമാകാൻ ഇന്ത്യ. രാജ്യത്തെ ആദ്യത്തെ "ഗിഗാ-സ്കെയിൽ" ഇലക്ട്രിക് എയർ ടാക്സി നിർമ്മാണ ശാല, അഥവാ ഒരു 'സ്കൈ ഫാക്ടറി' ആന്ധ്രാപ്രദേശിലെ അനന്തപൂരിൽ ഉയരും.
വിശാഖപട്ടണത്ത് നടന്ന സി.ഐ.ഐ (CII) പാർട്ണർഷിപ്പ് സമ്മിറ്റിലാണ് ഈ ചരിത്രപരമായ പ്രഖ്യാപനം നടന്നത്. കർണാടക ആസ്ഥാനമായി പ്രവർത്തിക്കുന്ന 'സർല ഏവിയേഷൻ' എന്ന കമ്പനിയാണ് ആന്ധ്ര സർക്കാരുമായി കൈകോർക്കുന്നത്. ഏകദേശം 1,300 കോടി രൂപയാണ് ഈ പദ്ധതിക്കായി പ്രാഥമികമായി നിക്ഷേപിക്കാൻ പോകുന്നത്. രണ്ട് വർഷത്തിനുള്ളിൽ ഡ്രോൺ ടാക്സികൾ നിർമ്മിച്ചു തുടങ്ങാനാണ് സംസ്ഥാനം ലക്ഷ്യമിടുന്നത്. ഇത് മുഖ്യമന്ത്രി ചന്ദ്രബാബു നായിഡുവിന്റെ വലിയൊരു സ്വപ്നം കൂടിയാണ്.
എന്താണ് ഈ 'സ്കൈ ഫാക്ടറി'?
അനന്തപൂരിലെ തിമ്മസമുദ്രം എന്ന ഗ്രാമത്തിലാണ് ഈ അത്യാധുനിക ഫാക്ടറി സ്ഥാപിക്കുന്നത്. ലോകത്തിലെ തന്നെ ഏറ്റവും വലിയ eVTOL (Electric Vertical Take-off and Landing) നിർമ്മാണ ശാലകളിൽ ഒന്നായിരിക്കും ഇത്. ഹെലികോപ്റ്റർ പോലെ കുത്തനെ ഉയരാനും താഴാനും സാധിക്കുന്ന ഇലക്ട്രിക് വിമാനങ്ങളാണ് eVTOL. ഇതിനായി 150 ഏക്കർ സ്ഥലത്താണ് ആദ്യഘട്ട നിർമ്മാണം ആരംഭിക്കുന്നത്. വിമാനങ്ങൾ നിർമ്മിക്കാൻ മാത്രമല്ല, അത് പരീക്ഷിക്കുന്നതിനായി 2 കിലോമീറ്റർ നീളമുള്ള ഒരു റൺവേയും ഇവിടെ സജ്ജീകരിക്കും.
പദ്ധതി പൂർത്തിയാകുന്നതോടെ വർഷത്തിൽ 1,000 എയർ ടാക്സികൾ വരെ ഇവിടെ നിർമ്മിക്കാൻ സാധിക്കുമെന്ന് സർല ഏവിയേഷൻ അവകാശപ്പെടുന്നു. സർല ഏവിയേഷന്റെ 'ശൂന്യ' എന്ന ഹൈബ്രിഡ് വിമാനങ്ങളും ഇതിൽ ഉൾപ്പെടും.
2027-ഓടെ ഇവിടെ ജോലികൾ ആരംഭിക്കാനും 2029-ഓടെ വാണിജ്യാടിസ്ഥാനത്തിൽ എയർ ടാക്സി സർവീസുകൾ തുടങ്ങാനും കമ്പനി ലക്ഷ്യമിടുന്നു. ആറ് പേർക്ക് സഞ്ചരിക്കാവുന്ന എയർ ടാക്സികളാണ് സർല ഏവിയേഷൻ വികസിപ്പിക്കുന്നത്.
ബെംഗളൂരു പോലുള്ള മെട്രോ നഗരങ്ങളിലെ യാത്രാസമയം മണിക്കൂറുകളിൽ നിന്ന് മിനിറ്റുകളിലേക്ക് കുറയ്ക്കാൻ ഇത്തരം എയർ ടാക്സികൾക്ക് സാധിക്കും. ഈ പദ്ധതി ഇന്ത്യയെ ഹരിത മൊബിലിറ്റിയുടെയും (Green Mobility) വ്യോമയാന സാങ്കേതികവിദ്യയുടെയും ഒരു പ്രധാന കേന്ദ്രമാക്കി മാറ്റാൻ സഹായിക്കുമെന്നാണ് പ്രതീക്ഷിക്കുന്നത്.
