റെയിൽവേ ടിക്കറ്റ് നിരക്കുകൾ വർദ്ധിപ്പിക്കാൻ കേന്ദ്ര സർക്കാർ തീരുമാനിച്ചു. 215 കിലോമീറ്ററിന് മുകളിലുള്ള ദൂരയാത്രകൾക്കാണ് നിരക്ക് വർദ്ധന ബാധകമാകുക. ഡിസംബർ 26 മുതൽ പുതിയ നിരക്കുകൾ പ്രാബല്യത്തിൽ വരുമെന്ന് റെയിൽവേ അധികൃതർ അറിയിച്ചു.
ഓർഡിനറി ക്ലാസ് ടിക്കറ്റുകൾക്ക് കിലോമീറ്ററിന് ഒരു പൈസയാണ് വർദ്ധിപ്പിക്കുന്നത്. മെയിൽ, എക്സ്പ്രസ് ട്രെയിനുകളിലെ നോൺ എസി, എസി ടിക്കറ്റുകൾക്ക് കിലോമീറ്ററിന് രണ്ട് പൈസ വീതം വർദ്ധനവുണ്ടാകും. അതേസമയം, 215 കിലോമീറ്ററിൽ താഴെയുള്ള ഹ്രസ്വദൂര യാത്രകളുടെ ടിക്കറ്റ് നിരക്കിൽ മാറ്റമുണ്ടാകില്ല എന്നത് സാധാരണക്കാർക്ക് അല്പം ആശ്വാസം നൽകുന്നതാണ്.
ടിക്കറ്റ് നിരക്ക് വർദ്ധനയിലൂടെ 600 കോടി രൂപയുടെ അധിക വരുമാനമാണ് റെയിൽവേ ലക്ഷ്യമിടുന്നത്. റെയിൽവേയുടെ നവീകരണ പ്രവർത്തനങ്ങൾക്കും മെച്ചപ്പെട്ട സേവനങ്ങൾക്കുമായി ഈ തുക വിനിയോഗിക്കുമെന്ന് അധികൃതർ വ്യക്തമാക്കി. നേരത്തെ ജൂലൈ മാസത്തിലും റെയിൽവേ ടിക്കറ്റ് നിരക്കുകൾ വർദ്ധിപ്പിച്ചിരുന്നു. തുടർച്ചയായ നിരക്ക് വർദ്ധന ദീർഘദൂര യാത്രക്കാരെ വലിയ രീതിയിൽ ബാധിക്കാൻ സാധ്യതയുണ്ട്.
ഡിസംബർ 26 മുതൽ ടിക്കറ്റ് ബുക്ക് ചെയ്യുന്നവർ പുതിയ നിരക്ക് നൽകേണ്ടി വരും. എന്നാൽ അതിനു മുൻപ് ടിക്കറ്റ് ബുക്ക് ചെയ്തവർക്ക് പഴയ നിരക്ക് തന്നെ ബാധകമായിരിക്കും. വിവരങ്ങളുമായി ദീപ്തി വാർത്തയിൽ ചേരുന്നു.
