സ്റ്റോക്ക് മാർക്കറ്റ്, ഓഹരി വിപണി, ഷെയർ മാർക്കറ്റ്... ഈ വാക്കുകൾ കേൾക്കുമ്പോൾ നിങ്ങളുടെ മനസ്സിൽ എന്താണ് വരുന്നത്? അധികം ആർക്കും മനസിലാകാത്ത, സങ്കീർണ്ണമായ എന്തോ ഒന്നാണെന്നാണോ? എന്നാൽ സംഗതി വളരെ ലളിതമാണ്. 

നൂറ്റാണ്ടുകൾക്ക് മുൻപ്, ഏകദേശം 1600-കളിൽ, ഡച്ച് ഈസ്റ്റ് ഇന്ത്യാ കമ്പനി എന്നൊരു വലിയ വ്യാപാര സ്ഥാപനമുണ്ടായിരുന്നു. ഇതിനെക്കുറിച്ച് നമ്മൾ ചരിത്ര ക്ലാസുകളിൽ പലപ്പോഴും കേട്ടിട്ടുള്ളതാണ്.

ലോകമെമ്പാടും കപ്പലുകളിൽ  സഞ്ചരിച്ച് അവർ സ്വർണ്ണവും, പട്ടും, സുഗന്ധവ്യഞ്ജനങ്ങളുമെല്ലാം കച്ചവടം നടത്തി. പക്ഷേ, ഈ വലിയ യാത്രകൾക്ക് ഒരുപാട് പണം ആവശ്യമായിരുന്നു.

അതിന് അവർ ഒരു വഴി കണ്ടെത്തി. സാധാരണ ജനങ്ങളോട് അവർ പണം ചോദിച്ചു. "ഞങ്ങളുടെ ഈ കപ്പൽ യാത്രയിൽ നിങ്ങളും പങ്കാളികളാകൂ, യാത്ര കഴിഞ്ഞ് ലാഭം കിട്ടുമ്പോൾ അതിൽ നിന്നൊരു പങ്ക് നിങ്ങൾക്കും തരാം." ഇതായിരുന്നു വാഗ്ദാനം.

ഇതൊരു വിജയമായിരുന്നു! കമ്പനിക്ക് വലിയ യാത്രകൾ നടത്താൻ പണം കിട്ടി, പണം കൊടുത്ത സാധാരണക്കാർക്ക് അതിൻ്റെ ലാഭവും കിട്ടി. യൂറോപ്പിലെ കാപ്പിക്കടകളിലും തുറമുഖങ്ങളിലും വെച്ച് നടന്ന ഈ കച്ചവടമാണ് സത്യത്തിൽ ലോകത്തിലെ ആദ്യത്തെ സ്റ്റോക്ക് മാർക്കറ്റിന് തുടക്കം കുറിച്ചത്!

അന്നത്തെ ആ ലളിതമായ ആശയം ഇന്നും നിലനിൽക്കുന്നു. പക്ഷെ, ഇന്നത്തെ സ്റ്റോക്ക് മാർക്കറ്റ് കുറച്ചുകൂടി സങ്കീർണ്ണമാണ്. അതെങ്ങനെയാണ് പ്രവർത്തിക്കുന്നതെന്ന് നമുക്ക് നോക്കാം.

ഒരാൾ ഒരു കമ്പനി തുടങ്ങുന്നതായി സങ്കൽപ്പിക്കുക.  ഈ കമ്പനി വലുതാക്കാൻ അവർക്ക് കൂടുതൽ പണം വേണം. അപ്പോൾ അവർ തങ്ങളുടെ കമ്പനിയുടെ 'ഓഹരികൾ' അഥവാ 'സ്റ്റോക്കുകൾ' വിൽക്കാൻ തീരുമാനിക്കുന്നു.

ആദ്യം അവർ വലിയ നിക്ഷേപകരെ സമീപിക്കും. അവർക്ക് ഈ കമ്പനിയുടെ ആശയത്തിൽ വിശ്വാസമുണ്ടെങ്കിൽ, അവർ പണം മുടക്കും. അതിനുശേഷം കമ്പനി IPO (Initial Public Offering) വഴി ഓഹരികൾ പൊതുജനങ്ങൾക്കായി തുറന്നുകൊടുക്കും.

ഇപ്പോൾ നിങ്ങൾക്കോ എനിക്കോ ആർക്കുവേണമെങ്കിലും ആ കമ്പനിയുടെ ഒരു ഓഹരി വാങ്ങാം. ഒരു ഓഹരി വാങ്ങുന്നതിലൂടെ, നമ്മൾ ആ കമ്പനിയുടെ ഒരു ചെറിയ ഭാഗത്തിൻ്റെ ഉടമയാവുകയാണ്.

നമ്മളെപ്പോലുള്ള ഒരുപാട് പേർ പണം മുടക്കുമ്പോൾ കമ്പനിക്ക് വളരാനുള്ള മൂലധനം ലഭിക്കുന്നു. കമ്പനി വളർന്ന് നല്ല ലാഭമുണ്ടാക്കുമ്പോൾ, കൂടുതൽ ആളുകൾക്ക് ആ കമ്പനിയിൽ വിശ്വാസം വരും. അവർ ഓഹരികൾ വാങ്ങാൻ തുടങ്ങും.

ഇവിടെയാണ് രസം. ഒരു സാധനത്തിന് ആവശ്യക്കാർ കൂടുമ്പോൾ അതിൻ്റെ വില കൂടുമല്ലോ? അതുപോലെ, കമ്പനിയുടെ ഓഹരിക്ക് ആവശ്യക്കാർ കൂടുമ്പോൾ അതിൻ്റെ വിലയും ഉയരും. ഇത് നേരത്തെ ഓഹരി വാങ്ങിയവർക്ക് വലിയ ലാഭമുണ്ടാക്കിക്കൊടുക്കും.

എന്നാൽ, നേരെമറിച്ച് സംഭവിച്ചാലോ? ഏതെങ്കിലും കാരണത്താൽ ആ കമ്പനിക്ക്  ലാഭം കുറയുകയാണെന്ന് കരുതുക. അപ്പോൾ ആളുകൾക്ക് പേടിയാകും. തങ്ങളുടെ കയ്യിലുള്ള ഓഹരിയുടെ വില ഇനിയും താഴേക്ക് പോകുന്നതിന് മുൻപ് വിറ്റ് ലാഭമെടുക്കാൻ അവർ ശ്രമിക്കും.ഇങ്ങനെ ഒരുപാട് പേർ ഓഹരികൾ വിൽക്കാൻ തുടങ്ങുമ്പോൾ, ആവശ്യക്കാർ കുറയുകയും വിൽക്കുന്നവരുടെ എണ്ണം കൂടുകയും ചെയ്യും. ഇത് ഓഹരിയുടെ വില താഴേക്ക് പോകാൻ കാരണമാകും.

ഈയൊരു ആവശ്യത്തിൻ്റെയും വിതരണത്തിൻ്റെയും (Supply and Demand) ഊഞ്ഞാലാട്ടമാണ് സ്റ്റോക്ക് മാർക്കറ്റിന്റെ അടിസ്ഥാനം.

എന്തുകൊണ്ടാണ് ഈ വില എപ്പോഴും മാറിക്കൊണ്ടിരിക്കുന്നത്? ഒരുപാട് കാരണങ്ങളുണ്ട്.

• കമ്പനിയുടെ ലാഭനഷ്ടങ്ങൾ.

• പുതിയ നിയമങ്ങളും സർക്കാർ നയങ്ങളും.

• കമ്പനിയെക്കുറിച്ച് വരുന്ന നല്ലതോ ചീത്തയോ ആയ വാർത്തകൾ.

• അസംസ്കൃത വസ്തുക്കളുടെ വിലയിലെ മാറ്റം.

• 
  

...അതിനെല്ലാമുപരി, മനുഷ്യന്റെ വിശ്വാസം! ഒരു കമ്പനി വളരുമെന്നുള്ള ആളുകളുടെ വിശ്വാസമാണ് ഓഹരി വിപണിയിലെ ഏറ്റവും വലിയ ശക്തി. ഈ വിശ്വാസത്തിന് സാമ്പത്തിക വളർച്ചയ്ക്കും തകർച്ചയ്ക്കും വരെ കാരണമാകാൻ കഴിയും. അതുകൊണ്ടാണ് പെട്ടെന്ന് പണമുണ്ടാക്കാൻ നോക്കുന്നതിനേക്കാൾ, ദീർഘകാലത്തേക്ക് നല്ല കമ്പനികളിൽ നിക്ഷേപിക്കുന്നതാണ് ബുദ്ധിയെന്ന് വിദഗ്ദ്ധർ പറയുന്നത്.

പണ്ട് കാലത്ത് പണക്കാർക്ക് മാത്രമായിരുന്നു ഇതൊക്കെ സാധ്യമെങ്കിൽ, ഇന്ന് ഇന്റർനെറ്റിന്റെ വരവോടെ കഥയാകെ മാറി. ഒരു വലിയ നിക്ഷേപകൻ എങ്ങനെയാണോ ഓഹരികൾ വാങ്ങുന്നത്, അതേ രീതിയിൽ ഇന്ന് സാധാരണക്കാർക്കും തങ്ങളുടെ മൊബൈൽ ഫോൺ ഉപയോഗിച്ച് ഇഷ്ടമുള്ള കമ്പനികളിൽ നിക്ഷേപം നടത്താം.

അതുകൊണ്ട്, സ്റ്റോക്ക് മാർക്കറ്റ് എന്നത് പേടിക്കേണ്ട ഒന്നല്ല. ശരിയായ രീതിയിൽ പഠിക്കുകയും മനസ്സിലാക്കുകയും ചെയ്താൽ, നിങ്ങൾ വിശ്വസിക്കുന്ന ബിസിനസ്സുകളെ പിന്തുണയ്ക്കാനും നിങ്ങളുടെ സാമ്പത്തിക ലക്ഷ്യങ്ങൾ നേടാനുമുള്ള ഒരു മികച്ച അവസരമാണിത്. അതിനുള്ള ആദ്യ പടി, ഇതിനെക്കുറിച്ച് പഠിച്ച് നിക്ഷേപം തുടങ്ങുക എന്നതാണ്!