അമീബിക് മസ്തിഷ്കജ്വര കേസുകളുടെ എണ്ണം വർധിക്കുമ്പോഴും രോഗബാധയുടെ ഉറവിടം ഇപ്പോഴും അവ്യക്തമായി തുടരുന്നത് ആശങ്ക വർധിപ്പിക്കുന്നു. ഈ മാസം ആദ്യം ഓമശ്ശേരി സ്വദേശിയായ മൂന്നു മാസം പ്രായമുള്ള കുഞ്ഞ് മരിച്ചത് ഈ രോഗം ബാധിച്ചാണെന്ന് സംശയിച്ചിരുന്നു. എന്നാൽ, കുഞ്ഞിനെ കുളിപ്പിച്ച കിണറ്റിലെ വെള്ളത്തിന്റെ പരിശോധനയിൽ രോഗകാരണമായ നെഗ്ലേരിയ ഫൗലേരിയയുടെ സാന്നിധ്യം കണ്ടെത്താനായിട്ടില്ല.

ആദ്യഘട്ടത്തിൽ കുഞ്ഞിന് രോഗം ബാധിച്ചത് കിണറ്റിലെ വെള്ളത്തിൽ നിന്നാണെന്ന് ആരോഗ്യവകുപ്പ് അറിയിച്ചിരുന്നുവെങ്കിലും, പിന്നീട് വന്ന പരിശോധനാ ഫലങ്ങൾ നെഗറ്റീവ് ആയിരുന്നു. എന്നാൽ, കുഞ്ഞിന് ബലമുത്തിയ മാൻഡ്രിലാസ് (Balamuthia mandrillaris) എന്ന ബാക്ടീരിയയാണ് രോഗബാധയ്ക്ക് കാരണമായതെന്ന് സ്ഥിരീകരിച്ചിട്ടുണ്ട്. മറ്റ് അമീബിക് മസ്തിഷ്കജ്വര പരിശോധനകൾ നെഗറ്റീവായ സാഹചര്യത്തിൽ, കുഞ്ഞിന് എന്താണ് സംഭവിച്ചതെന്ന് ആരോഗ്യവകുപ്പ് കൃത്യമായ വിശദീകരണം നൽകിയിട്ടില്ലെന്ന് പിതാവ് ആവശ്യപ്പെട്ടു.

നിലവിൽ കോഴിക്കോട്ടെ വിവിധ ആശുപത്രികളിൽ 11 പേർ അമീബിക് മസ്തിഷ്കജ്വരം ബാധിച്ച് ചികിത്സയിലുണ്ടെന്ന് റിപ്പോർട്ടുകൾ പറയുന്നു. ഇതിൽ കോഴിക്കോട് മെഡിക്കൽ കോളേജ് ആശുപത്രിയിൽ ആറ് പേരും, മാതൃശിശു സംരക്ഷണ കേന്ദ്രത്തിൽ മൂന്ന് കുട്ടികളും, ഒരു സ്വകാര്യ ആശുപത്രിയിൽ ഒരാളും ചികിത്സയിലുണ്ട്. മലബാർ മേഖലയിൽ മാത്രം എട്ട് മരണങ്ങൾ റിപ്പോർട്ട് ചെയ്തിട്ടുണ്ട്]. താമരശ്ശേരി സ്വദേശി അനയ, മലപ്പുറം വണ്ടൂർ തിരുവാലി സ്വദേശി ശോഭന, വയനാട് ബത്തേരി സ്വദേശി രതീഷ്, മലപ്പുറം കണ്ണമംഗലം സ്വദേശി റംല, ചേലേമ്പ്ര സ്വദേശി ഷാജി എന്നിവരാണ് ഇതിന് മുൻപ് മെഡിക്കൽ കോളേജ് ആശുപത്രിയിൽ മരിച്ചവരിൽ ചിലർ.

രോഗം ബാധിച്ച് മരിച്ച റഹീമിനൊപ്പം കോഴിക്കോട് പന്നിയങ്കരയിലെ ഹോട്ടലിൽ ജോലിചെയ്തിരുന്ന ശശിയും സമാന ലക്ഷണങ്ങളോടെ മരിച്ച നിലയിൽ കണ്ടെത്തിയതോടെ ഹോട്ടൽ അടച്ചിടാൻ കോർപ്പറേഷൻ നിർദേശം നൽകിയിട്ടുണ്ട്. റഹീമിന്റെ രോഗ ഉറവിടം കണ്ടെത്താനായിട്ടില്ല. റഹീമും ശശിയും താമസിച്ചിരുന്ന വീട്ടിലെ കിണറ്റിലെ വെള്ളം ആരോഗ്യവകുപ്പ് ശേഖരിച്ച് പരിശോധനയ്ക്ക് അയച്ചിട്ടുണ്ട്.

രോഗവ്യാപനം വർദ്ധിക്കുകയും മരണങ്ങൾ സംഭവിക്കുകയും ചെയ്യുമ്പോഴും, പല കേസുകളിലും രോഗത്തിന്റെ കൃത്യമായ ഉറവിടം കണ്ടെത്താൻ ആരോഗ്യവകുപ്പിന് ഇതുവരെ സാധിച്ചിട്ടില്ല. ഇത് വലിയ ആശങ്കയ്ക്ക് വഴിയൊരുക്കുന്നുണ്ട്. രോഗം കണ്ടെത്തുന്നതിൽ ശാസ്ത്രീയമായ ശ്രമങ്ങളും കൂട്ടായ പ്രവർത്തനങ്ങളും നടക്കുന്നില്ലെന്ന് ഡോക്ടർമാർക്കിടയിൽ വിമർശനമുണ്ട്. മലിനമായ കുളങ്ങൾ, പായൽ നിറഞ്ഞതും കെട്ടിക്കിടക്കുന്നതുമായ ജലാശയങ്ങൾ, വൃത്തിയാക്കാത്ത ജലസംഭരണികൾ എന്നിവയിൽ ഈ അമീബ കാണപ്പെടുന്നുവെന്ന് ആരോഗ്യവകുപ്പ് മുന്നറിയിപ്പ് നൽകിയിരുന്നു. കോളിഫോം ബാക്ടീരിയ കൂടുതലുള്ള വെള്ളത്തിൽ അമീബയുടെ സാന്നിധ്യം കൂടുതലായി കണ്ടുവെന്നും കൃത്യമായ ഓവുചാൽ സംവിധാനമില്ലാത്തതും അടുത്തടുത്ത് വീടുകളുള്ളതിനാൽ സെപ്റ്റിക് ടാങ്കുകളിൽനിന്നുള്ള വെള്ളം കിണറുകളിൽ കലരാൻ ഇടയാകുന്നതും അപകടകരമാണെന്നും ഡോക്ടർമാർ പറയുന്നു.