ഉത്തർപ്രദേശിലെ ഫിറോസാബാദിൽ ഒന്നര വയസ്സുകാരനായ ആൺകുട്ടിയെ ക്രൂരമായി നിലത്തെറിഞ്ഞ് കൊലപ്പെടുത്തിയ കേസിൽ പ്രതിയെ പൊലീസ് അറസ്റ്റ് ചെയ്തു. കുട്ടിയുടെ അമ്മയുടെ സുഹൃത്തായ ജിതേന്ദ്ര പഥക് എന്ന യുവാവാണ് അറസ്റ്റിലായത്. ക്രൂരമായ ഈ കൊലപാതകത്തിന്റെ സിസിടിവി (CCTV) ദൃശ്യങ്ങൾ പുറത്തുവന്നതോടെയാണ് സംഭവം പുറംലോകമറിഞ്ഞത്.
കഴിഞ്ഞ മുപ്പതാം തീയതിയാണ് മനുഷ്യ മനഃസാക്ഷിയെ ഞെട്ടിച്ച സംഭവം നടന്നത്. കുട്ടിയുടെ അമ്മ രതി ഒരു ബന്ധുവിന്റെ വീട്ടിലേക്ക് പോയ സമയത്താണ് പ്രതി കുഞ്ഞിനെ കൊണ്ടുപോയി ക്രൂരതയ്ക്ക് ഇരയാക്കിയത്. റോഡിൽ വെച്ച് കുഞ്ഞിന്റെ കാലിൽ പിടിച്ച് അന്തരീക്ഷത്തിൽ ഉയർത്തി റോഡിലേക്ക് വലിച്ചെറിയുകയായിരുന്നു. വെറും 34 സെക്കൻഡുകൾക്കിടയിൽ എട്ട് തവണയാണ് ഇയാൾ കുഞ്ഞിനെ ക്രൂരമായി നിലത്തെറിഞ്ഞത്. തലയ്ക്ക് ഗുരുതരമായി പരിക്കേറ്റ കുഞ്ഞ് പിന്നീട് മരണത്തിന് കീഴടങ്ങി.
പ്രതിയായ ജിതേന്ദ്രയും കുട്ടിയുടെ അമ്മ രതിയും തമ്മിൽ പ്രണയത്തിലായിരുന്നുവെന്ന് പൊലീസ് പറയുന്നു. രതിയെ വിവാഹം കഴിക്കാൻ ഇയാൾ ആഗ്രഹിച്ചിരുന്നു. എന്നാൽ ഇവരുടെ ബന്ധത്തിനും വിവാഹത്തിനും കുഞ്ഞ് ഒരു തടസ്സമാകുമെന്ന ചിന്തയാണ് കൊലപാതകത്തിലേക്ക് നയിച്ചതെന്നാണ് പ്രാഥമിക നിഗമനം. സംഭവത്തിൽ കേസെടുത്ത ഉത്തർപ്രദേശ് പൊലീസ് പ്രതിക്കെതിരെ കർശന നിയമനടപടികളുമായി മുന്നോട്ട് പോവുകയാണ്.
