വരാനിരിക്കുന്ന 2026 ഫിഫ ലോകകപ്പ് ഫുട്ബോൾ മത്സരങ്ങളിൽ ഇന്ത്യൻ ആരാധകർക്ക് ആവേശം പകരാൻ രണ്ട് ഇന്ത്യൻ വംശജരായ താരങ്ങൾ മൈതാനത്തിറങ്ങും. ന്യൂസിലാൻഡിനായി കളിക്കുന്ന പഞ്ചാബി വംശജൻ സർപ്രീത് സിങ്ങും, ഖത്തറിനായി കളിക്കുന്ന മലയാളി താരം തഹ്സീൻ മുഹമ്മദുമാണ് ലോകകപ്പ് വേദിയിൽ ഇന്ത്യൻ സാന്നിധ്യമാകാൻ ഒരുങ്ങുന്നത്. 2006 ലോകകപ്പിൽ ഫ്രാൻസിന് വേണ്ടി കളത്തിലിറങ്ങിയ വികാഷ് ദൊരശൂവിന് ശേഷം ലോകകപ്പ് വേദിയിലെത്തുന്ന ആദ്യ ഇന്ത്യൻ വംശജരാകും ഇവർ.
ന്യൂസിലാൻഡിൽ സാധാരണ കട നടത്തുന്ന ഒരു പഞ്ചാബി കുടുംബത്തിൽ 1999-ലാണ് സർപ്രീത് സിങ് ജനിച്ചത്. കുട്ടിക്കാലത്ത് ക്രിക്കറ്റും ബാസ്ക്കറ്റ്ബോളും ഫുട്ബോളുമെല്ലാം ഒരുപോലെ കളിച്ചിരുന്ന സർപ്രീത്, പിന്നീട് അമ്മ ശരൺജിത്തിന്റെ കടുത്ത പിന്തുണയിലാണ് ഫുട്ബോളിലേക്ക് പൂർണ്ണമായി ശ്രദ്ധ തിരിക്കുന്നത്. സച്ചിൻ ടെണ്ടുൽക്കറും വിരാട് കോലിയുമാണ് സർപ്രീതിന്റെ പ്രിയപ്പെട്ട താരങ്ങൾ. പതിനാറാം വയസ്സിൽ പ്രൊഫഷണൽ ഫുട്ബോളറായ താരം ജർമ്മനി, പോർച്ചുഗൽ, സെർബിയ തുടങ്ങിയ രാജ്യങ്ങളിലെ പ്രമുഖ ക്ലബ്ബുകൾക്കായി കളിച്ചിട്ടുണ്ട്. 2018-ൽ ദേശീയ ടീമിനായി അരങ്ങേറിയ സർപ്രീത്, മുംബൈയിൽ നടന്ന ഇന്റർകോണ്ടിനെന്റൽ കപ്പിൽ ഇന്ത്യക്കെതിരായ മത്സരത്തിൽ രണ്ട് ഗോളുകൾക്ക് അസിസ്റ്റ് നൽകി മികച്ച പ്രകടനം കാഴ്ചവെച്ചിരുന്നു.
സർപ്രീതിനൊപ്പം ഖത്തർ ടീമിലൂടെ ലോകകപ്പിനെത്തുന്ന മലയാളി താരം തഹ്സീൻ മുഹമ്മദിന്റെ സാന്നിധ്യം കേരളത്തിലെ ഫുട്ബോൾ പ്രേമികൾക്ക് വലിയ ആവേശമാണ് നൽകുന്നത്. ഖത്തർ ക്ലബ് ഫുട്ബോളിൽ ശ്രദ്ധേയമായ പ്രകടനം കാഴ്ചവെച്ച തഹ്സീൻ ലോകകപ്പ് ടീമിലും തന്റെ സ്ഥാനം ഉറപ്പിക്കുകയായിരുന്നു. രണ്ട് ഇന്ത്യൻ വംശജരായ താരങ്ങൾ ലോകകപ്പ് ഫുട്ബോളിൽ മത്സരിക്കാനിറങ്ങുമ്പോൾ അത് ഇന്ത്യൻ കായികരംഗത്തിന് തന്നെ വലിയൊരു അഭിമാന നിമിഷമായി മാറും.
