കോഴിക്കോട്: മദ്യപിച്ച് വാഹനമോടിച്ച കേസിൽ പിടിയിലായ യുട്യൂബർ അശ്വന്ത് കോക്കിന്റെ ഡ്രൈവിംഗ് ലൈസൻസ് സസ്പെൻഡ് ചെയ്യും. വിഷയത്തിൽ മോട്ടോർ വാഹന വകുപ്പിന് റിപ്പോർട്ട് കൈമാറുമെന്ന് നടക്കാവ് സർക്കിൾ ഇൻസ്പെക്ടർ ജംഷീദ് പ്രതികരിച്ചു. കേസിൽ തുടർനടപടികൾ ആരംഭിച്ചതായും അദ്ദേഹം പറഞ്ഞു.അശ്വന്ത് കോക്കിന്റെ ഥാറിൽ നിന്ന് എയർഗണ്ണും പെല്ലറ്റുകളും കണ്ടെത്തിയിട്ടുണ്ട്. കസ്റ്റഡിയിലെടുത്ത വാഹനത്തിൽ നടത്തിയ പരിശോധനയിലാണ് നടക്കാവ് പൊലിസ് ഇവ കണ്ടെത്തിയത്. മദ്യക്കുപ്പികളും വാഹനത്തിൽനിന്ന് കണ്ടെടുത്തിട്ടുണ്ട്.
കഴിഞ്ഞദിവസമാണ് അപകടകരമായി വാഹനമോടിച്ച് ഭീകരാന്തരീക്ഷം സൃഷ്ടിച്ച സംഭവത്തിൽ സിനിമാ വ്ലോഗറായ അശ്വന്ത് കോക്കിനെ നടക്കാവ് പൊലിസ് കസ്റ്റഡിയിലെടുത്തത്.
