ദുബായ്: ചാമ്പ്യന്സ് ട്രോഫി ക്രിക്കറ്റിന്റെ ഫൈനലിലെത്താൻ ഇന്ത്യയ്ക്ക് 265 റണ്സ് വിജയലക്ഷ്യമുയര്ത്തി ഓസ്ട്രേലിയ. സെമിഫൈനലിൽ ടോസ് നേടി ബാറ്റിങ്ങിനിറങ്ങിയ ഓസീസ് 49.3 ഓവറില് 264 റണ്സിന് ഓള്ഔട്ടായി. ക്യാപ്റ്റന് സ്റ്റീവ് സ്മിത്ത്, വിക്കറ്റ് കീപ്പര് അലക്സ് കാരി ട്രാവിസ് ഹെഡ് എന്നിവരുടെ ഇന്നിങ്സുകളാണ് ഓസീസിന് മികച്ച സ്കോര് സമ്മാനിച്ചത്.
രണ്ടാം വിക്കറ്റില് സ്മിത്തിനൊപ്പം ഹെഡും മാര്നസ് ലബുഷെയ്നിനും അലക്സ് കാരിക്കുമൊപ്പം സ്റ്റീവ് സ്മിത്തും പടുത്തുയര്ത്തിയ അര്ധ സെഞ്ചുറി കൂട്ടുകെട്ടുകള് ഓസീസിന് നിര്ണായകമായി.96 പന്തില് നിന്ന് ഒരു സിക്സും നാലു ഫോറുമടക്കം 73 റണ്സെടുത്ത സ്മിത്താണ് ഓസീസിന്റെ ടോപ് സ്കോറര്. 57 പന്തുകള് നേരിട്ട കാരി ഒരു സിക്സും എട്ട് ഫോറുമടക്കം 61 റണ്സെടുത്ത് റണ്ണൗട്ടായി.
നേരത്തേ ടോസ് നേടിയ ഓസ്ട്രേലിയ ബാറ്റിങ് തിരഞ്ഞെടുക്കുകയായിരുന്നു. ഇത് തുടര്ച്ചയായ 14-ാം തവണയാണ് ഏകദിനത്തില് ഇന്ത്യക്ക് ടോസ് നഷ്ടപ്പെടുന്നത്.
