മുംബൈ: അന്തരിച്ച എൻസിപി (എപി) അധ്യക്ഷൻ അജിത് പവാറിന്റെ ഭാര്യ സുനേത്ര പവാർ മഹാരാഷ്ട്രയുടെ പുതിയ ഉപമുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേറ്റു. സംസ്ഥാന ചരിത്രത്തിൽ ഈ പദവിയിലെത്തുന്ന ആദ്യ വനിതയാണ് അവർ. മുംബൈയിലെ ലോക് ഭവനിൽ നടന്ന ചടങ്ങിൽ ഗവർണർ ആചാര്യ ദേവ്‌രത് അവർക്ക് സത്യവാചകം ചൊല്ലിക്കൊടുത്തു. മുഖ്യമന്ത്രി ദേവേന്ദ്ര ഫഡ്‌നാവിസ്, ഉപമുഖ്യമന്ത്രി ഏകനാഥ് ഷിൻഡെ എന്നിവർ ചടങ്ങിൽ പങ്കെടുത്തു.
കഴിഞ്ഞ ബുധനാഴ്ച ബാരാമതിയിലുണ്ടായ ദാരുണമായ വിമാനാപകടത്തിലാണ് അജിത് പവാർ അന്തരിച്ചത്. അദ്ദേഹത്തിന്റെ വിയോഗത്തെത്തുടർന്ന് ഒഴിഞ്ഞുകിടന്ന പദവിയിലേക്കാണ് ഇപ്പോൾ സുനേത്ര പവാർ എത്തിയിരിക്കുന്നത്. അജിത് പവാറിന്റെ രാഷ്ട്രീയ പൈതൃകം കാത്തുസൂക്ഷിക്കാനും പാർട്ടിയിലെയും ഭരണത്തിലെയും ഐക്യം നിലനിർത്താനും ലക്ഷ്യമിട്ടാണ് സുനേത്രയെ ഈ നിർണ്ണായക സ്ഥാനത്തേക്ക് പാർട്ടി നിയോഗിച്ചത്. വരാനിരിക്കുന്ന നിയമസഭാ തിരഞ്ഞെടുപ്പിന് തൊട്ടുമുമ്പുള്ള ഈ നീക്കം മഹാരാഷ്ട്ര രാഷ്ട്രീയത്തിൽ വലിയ പ്രാധാന്യമർഹിക്കുന്നു.
