കേരളത്തിലെ തദ്ദേശ സ്വയംഭരണ സ്ഥാപനങ്ങളിലേക്ക് തിരഞ്ഞെടുക്കപ്പെട്ട പുതിയ ജനപ്രതിനിധികളുടെ സത്യപ്രതിജ്ഞാ ചടങ്ങുകൾ ഇന്ന് പൂർത്തിയായി. ഗ്രാമ, ബ്ലോക്ക്, ജില്ലാ പഞ്ചായത്തുകളിലും നഗരസഭകളിലും കോർപ്പറേഷനുകളിലുമായി ആയിരക്കണക്കിന് അംഗങ്ങളാണ് ഇന്ന് സത്യപ്രതിജ്ഞ ചെയ്ത് അധികാരമേറ്റത്.
ജില്ലാ പഞ്ചായത്തുകളിലും കോർപ്പറേഷനുകളിലും ജില്ലാ കളക്ടർമാരുടെ നേതൃത്വത്തിലായിരുന്നു ചടങ്ങുകൾ നടന്നത്. ഓരോ സ്ഥാപനത്തിലെയും ഏറ്റവും മുതിർന്ന അംഗത്തിന് കളക്ടർ സത്യവാചകം ചൊല്ലിക്കൊടുത്തു. തുടർന്ന് ഈ അംഗം മറ്റംഗങ്ങൾക്ക് സത്യവാചകം ചൊല്ലിക്കൊടുത്തു. ഗ്രാമ-ബ്ലോക്ക് പഞ്ചായത്തുകളിലും മുനിസിപ്പാലിറ്റികളിലും അതത് വരണാധികാരികളാണ് സത്യപ്രതിജ്ഞാ ചടങ്ങിന് നേതൃത്വം നൽകിയത്.
തിരുവനന്തപുരം കോർപ്പറേഷനിൽ ചരിത്രത്തിലാദ്യമായി ഭരണം പിടിച്ചെടുത്ത ബിജെപി കൗൺസിലർമാരുടെ സത്യപ്രതിജ്ഞാ ചടങ്ങ് വലിയ ആഘോഷമായി. പാളയം രക്തസാക്ഷി മണ്ഡപത്തിൽ നിന്നാണ് ബിജെപി അംഗങ്ങൾ സത്യപ്രതിജ്ഞയ്ക്കായി എത്തിയത്. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ ഉൾപ്പെടെയുള്ള പ്രമുഖർ ചടങ്ങിന് സാക്ഷ്യം വഹിക്കാൻ എത്തിയിരുന്നു. തിരുവനന്തപുരത്ത് കെ.എസ് ശബരീനാഥൻ ഉൾപ്പെടെയുള്ള കോൺഗ്രസ് അംഗങ്ങളും സത്യപ്രതിജ്ഞ ചെയ്തു.
കോഴിക്കോട് കോർപ്പറേഷനിൽ കണ്ടംകുളം ജൂബിലി ഹാളിലായിരുന്നു സത്യപ്രതിജ്ഞാ ചടങ്ങുകൾ. യുഡിഎഫിന്റെ മേയർ സ്ഥാനാർത്ഥി എസ്.കെ അബൂബക്കർ ഉൾപ്പെടെയുള്ളവർ ഇവിടെ സത്യപ്രതിജ്ഞ ചെയ്തു. വിവിധ അംഗങ്ങൾ വ്യത്യസ്തമായ രീതികളിൽ സത്യപ്രതിജ്ഞ ചൊല്ലിയത് ശ്രദ്ധേയമായി. ചിലർ ദൈവനാമത്തിലും മറ്റു ചിലർ ദൃഢപ്രതിജ്ഞയുമാണ് എടുത്തത്. ബിജെപി അംഗങ്ങളിൽ ചിലർ സംസ്കൃതത്തിലും ദൈവനാമങ്ങളിലും സത്യപ്രതിജ്ഞ ചെയ്തു.
യുഡിഎഫിനെ സംബന്ധിച്ചിടത്തോളം തെക്കൻ കേരളത്തിൽ, പ്രത്യേകിച്ച് തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളിൽ നേടിയ വൻ മുന്നേറ്റത്തിന്റെ ആവേശത്തിലായിരുന്നു സത്യപ്രതിജ്ഞാ ചടങ്ങുകൾ. പത്തനംതിട്ടയിൽ 17 വാർഡുകളിലെയും അംഗങ്ങൾ സത്യപ്രതിജ്ഞ ചെയ്തു.
സത്യപ്രതിജ്ഞാ ചടങ്ങുകൾക്ക് ശേഷം പുതിയ ഭരണസമിതികളുടെ ആദ്യ യോഗങ്ങൾ ഇന്ന് തന്നെ ചേർന്നു. കോർപ്പറേഷനുകളിലെയും നഗരസഭകളിലെയും മേയർ, ചെയർപേഴ്സൺ സ്ഥാനങ്ങളിലേക്കുള്ള തിരഞ്ഞെടുപ്പ് ഡിസംബർ 26-നും പഞ്ചായത്ത് പ്രസിഡന്റ് തിരഞ്ഞെടുപ്പ് ഡിസംബർ 27-നുമാണ് നടക്കുക. ഇതോടെ സംസ്ഥാനത്തെ തദ്ദേശ ഭരണകൂടങ്ങൾ പൂർണ്ണമായി പ്രവർത്തനസജ്ജമാകും.
