കേരളത്തിൽ നിന്നുള്ള അന്തർസംസ്ഥാന സ്വകാര്യ ബസുകൾ ഇന്ന് മുതൽ അനിശ്ചിതകാല പണിമുടക്ക് ആരംഭിക്കും. തമിഴ്നാട്, കർണാടക സംസ്ഥാനങ്ങൾ അന്യായമായി നികുതിയും പിഴയും ഈടാക്കുന്നു എന്ന് ആരോപിച്ചാണ് സമരം.ഇന്ന് വൈകിട്ട് ആറു മണി മുതൽ സർവീസുകൾ നിർത്തിവെക്കുമെന്ന് ലക്ഷ്വറി ബസ് ഓണേഴ്സ് അസോസിയേഷൻ അറിയിച്ചു. ഇതോടെ ബെംഗളൂരു, ചെന്നൈ തുടങ്ങിയ നഗരങ്ങളിലേക്കുള്ള ആയിരക്കണക്കിന് യാത്രക്കാർ യാത്രാദുരിതത്തിലാകും.
ഓൾ ഇന്ത്യ ടൂറിസ്റ്റ് പെർമിറ്റുള്ള ബസുകളിൽ നിന്ന് തമിഴ്നാടും കർണാടകയും ഭീമമായ തുക നികുതിയായി ഈടാക്കുകയും, നിയമവിരുദ്ധമായി പിഴ ചുമത്തുകയും വാഹനങ്ങൾ പിടിച്ചെടുക്കുകയും ചെയ്യുന്നതായി ബസുടമകൾ ആരോപിക്കുന്നു. ഈ നടപടികൾ കാരണം വലിയ സാമ്പത്തിക നഷ്ടമാണ് ഉണ്ടാകുന്നതെന്നും, സുരക്ഷിതമായി സർവീസ് നടത്താൻ കഴിയാത്ത സാഹചര്യമാണെന്നും ലക്ഷ്വറി ബസ് ഓണേഴ്സ് അസോസിയേഷൻ ഭാരവാഹികൾ പറഞ്ഞു.
സ്ലീപ്പർ, സെമി സ്ലീപ്പർ ലക്ഷ്വറി ബസുകളാണ് പ്രധാനമായും പണിമുടക്കുന്നത്. കേരളത്തിലെ 14 ജില്ലകളിൽ നിന്നും ബെംഗളൂരു, ചെന്നൈ, ഹൈദരാബാദ്, മധുര തുടങ്ങിയ നഗരങ്ങളിലേക്ക് ദിവസേന നൂറുകണക്കിന് സർവീസുകളാണ് ഈ വിഭാഗത്തിലുള്ള ബസുകൾ നടത്തുന്നത്. കൊച്ചി-ബെംഗളൂരു റൂട്ടിൽ മാത്രം ഏകദേശം 80 ബസുകൾ ദിവസവും സർവീസ് നടത്തുന്നുണ്ട്.
അഖിലേന്ത്യാ ടൂറിസ്റ്റ് പെർമിറ്റ് പ്രകാരം ദേശീയ പെർമിറ്റ് ഫീസ് അടച്ചാൽ മറ്റു സംസ്ഥാനങ്ങളിൽ അധിക നികുതി നൽകേണ്ടതില്ലെന്നാണ് നിയമം. എന്നാൽ ഈ നിയമം ലംഘിച്ചാണ് അയൽ സംസ്ഥാനങ്ങൾ കേരളത്തിൽ നിന്നുള്ള ബസുകളിൽ നിന്നും നികുതി പിരിക്കുന്നതെന്ന് ബസുടമകൾ പറയുന്നു.
അതേസമയം, പെർമിറ്റ് ചട്ടങ്ങൾ ലംഘിക്കുന്നു എന്ന് ആരോപിച്ച് കേരള മോട്ടോർ വാഹന വകുപ്പ് തമിഴ്നാട് രജിസ്ട്രേഷനിലുള്ള ബസുകൾക്കെതിരെ നടപടി എടുത്തിരുന്നു. ഇതിൽ പ്രതിഷേധിച്ച് തമിഴ്നാട്ടിലെ ഓമ്നി ബസ് ഉടമകളും കേരളത്തിലേക്കുള്ള സർവീസുകൾ നിർത്തിവെച്ചിരിക്കുകയാണ്. ഇതോടെ ഇരു സംസ്ഥാനങ്ങളിലേക്കുമുള്ള യാത്ര പൂർണ്ണമായും സ്തംഭിക്കുന്ന അവസ്ഥയാണ്.
വിഷയത്തിൽ കേരള സർക്കാർ ഇടപെട്ട് ശാശ്വത പരിഹാരം കാണണമെന്നാണ് ബസുടമകളുടെ ആവശ്യം. സമരം ശക്തമാകുന്നതോടെ വിദ്യാർത്ഥികളും സോഫ്റ്റ്‌വെയർ ജീവനക്കാരും ഉൾപ്പെടെയുള്ള സ്ഥിരം യാത്രക്കാർ വലിയ പ്രതിസന്ധിയിലാകും.
