ഉത്തരേന്ത്യൻ സംസ്ഥാനങ്ങളിൽ കഴിഞ്ഞ കുറച്ച് ദിവസങ്ങളായി അതിശക്തമായ മഴ തുടരുകയാണ്. ഇത് ഡൽഹി ഉൾപ്പെടെയുള്ള നിരവധി പ്രദേശങ്ങളിൽ വലിയ ദുരിതമാണ് സൃഷ്ടിച്ചിരിക്കുന്നത്. ഡൽഹിയിൽ പ്രളയ മുന്നറിയിപ്പ് നൽകിയിട്ടുണ്ട്, കൂടാതെ യമുനാ നദിയിലെ ജലനിരപ്പ് അപകടകരമായ നിലയ്ക്ക് മുകളിലാണ്. ഈ സാഹചര്യത്തിൽ യമുനാ നദിക്കരയിൽ താമസിക്കുന്നവരെ മാറ്റിപ്പാർപ്പിക്കാനുള്ള ശ്രമങ്ങൾ നടക്കുന്നുണ്ട്. ഡൽഹി, ഗുരുഗ്രാം, നോയിഡ എന്നിവിടങ്ങളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. കൂടാതെ, സ്കൂളുകൾക്ക് അവധി നൽകുകയും സ്വകാര്യ സ്ഥാപനങ്ങളിലെ ജീവനക്കാർക്ക് വർക്ക് ഫ്രം ഹോം അനുവദിക്കണമെന്ന് അധികൃതർ നിർദ്ദേശിക്കുകയും ചെയ്തിട്ടുണ്ട്.
യമുനാ നദിയിലെ പഴയ പാലത്തിലൂടെയുള്ള യാത്ര ഇന്ന് വൈകുന്നേരത്തോടെ പൂർണ്ണമായും നിരോധിക്കുമെന്നും, പാലം അടയ്ക്കുമെന്നും അധികൃതർ അറിയിച്ചു. നദിയിലെ വർദ്ധിച്ച ജലനിരപ്പ് കണക്കിലെടുത്താണ് ഈ തീരുമാനം . പഞ്ചാബിൽ നിന്ന് കൂടുതൽ വെള്ളം തുറന്നുവിടുന്നതും യമുനാ നദിയിലെ ജലനിരപ്പ് ഉയരാൻ കാരണമായിട്ടുണ്ട്.
ഹിമാചൽ പ്രദേശിൽ ഉണ്ടായ മണ്ണിടിച്ചിലിനെ തുടർന്ന് മലയാളികൾ ഉൾപ്പെടെയുള്ള വിനോദസഞ്ചാരികൾ കുടുങ്ങിക്കിടക്കുകയാണ്. റോഡ് ഗതാഗതം തടസ്സപ്പെട്ടതാണ് ഇവരുടെ മടക്കയാത്ര പ്രതിസന്ധിയിലാക്കിയത്. നിലവിൽ ഇവർ സുരക്ഷിതരാണെങ്കിലും, എത്രയും പെട്ടെന്ന് എയർലിഫ്റ്റ് ചെയ്ത് തിരിച്ചെത്തിക്കാനുള്ള ശ്രമങ്ങൾ തുടരുകയാണ്. കേന്ദ്ര ആഭ്യന്തര മന്ത്രിയുടെ ജമ്മു കാശ്മീർ സന്ദർശന വേളയിൽ പോലും കനത്ത മഴ കാരണം വിമാനം തിരിച്ചുവിടേണ്ട സാഹചര്യം ഉണ്ടായിരുന്നു, ഇത് മേഖലയിലെ മഴക്കെടുതിയുടെ രൂക്ഷത എടുത്തു കാണിക്കുന്നു..
നിലവിൽ മരണങ്ങളൊന്നും റിപ്പോർട്ട് ചെയ്തിട്ടില്ലെങ്കിലും, വീടുകൾ തകർന്നു വീണതിനെ തുടർന്ന് ചിലർക്ക് പരിക്കേറ്റിട്ടുണ്ട്. നിലവിലെ സാഹചര്യത്തിൽ നദി കരകവിഞ്ഞൊഴുകുകയാണെങ്കിൽ അത് കൂടുതൽ നാശനഷ്ടങ്ങൾക്കും ജീവഹാനിക്കും കാരണമായേക്കാമെന്നും റിപ്പോർട്ടുകൾ സൂചിപ്പിക്കുന്നു.
