തദ്ദേശ തിരഞ്ഞെടുപ്പ് വേളയിൽ വലിയ രാഷ്ട്രീയ വിവാദങ്ങൾക്ക് വഴിതെളിച്ച 'പോട്ടിയെ കെട്ടിയെ' എന്ന പാരഡി ഗാനത്തിനെതിരെയുള്ള കേസ് പിൻവലിക്കാൻ സർക്കാർ ഒരുങ്ങുന്നു. ശരണമന്ത്രത്തെ അപമാനിക്കുന്ന രീതിയിൽ വരികൾ ചിട്ടപ്പെടുത്തി മതവിദ്വേഷം പടർത്താൻ ശ്രമിച്ചു എന്ന പരാതിയിലാണ് തിരുവനന്തപുരം സൈബർ പൊലീസ് നേരത്തെ കേസെടുത്തിരുന്നത്.
ഗാനരചയിതാവ് ഉൾപ്പെടെ നാലുപേർക്കെതിരെയാണ് പൊലീസ് എഫ്ഐആർ രജിസ്റ്റർ ചെയ്തിരുന്നത്. തിരഞ്ഞെടുപ്പ് പ്രചാരണ സമയത്ത് സാമൂഹിക മാധ്യമങ്ങളിൽ ഈ ഗാനം വലിയ രീതിയിൽ വൈറലായിരുന്നു. ഇതിനെതിരെ ശക്തമായ പ്രതിഷേധം ഉയർന്നതിനെത്തുടർന്നാണ് പൊലീസ് നടപടിയുണ്ടായത്. ഈ ഗാനം സാമൂഹിക മാധ്യമങ്ങളിൽ നിന്ന് നീക്കം ചെയ്യണമെന്ന് ആവശ്യപ്പെട്ട് പ്രതിപക്ഷ നേതാവ് വി.ഡി. സതീശൻ മെറ്റ (Meta) അധികൃതർക്ക് കത്തയച്ചിരുന്നു. എന്നാൽ മെറ്റയും യൂട്യൂബും ഈ ആവശ്യത്തോട് പ്രതികരിക്കുകയോ ഗാനം നീക്കം ചെയ്യുകയോ ചെയ്തിരുന്നില്ല.
പരാതിക്കാരന്റെ മൊഴിയും സൈബർ പൊലീസിന്റെ കണ്ടെത്തലുകളും പരിഗണിച്ചാണ് കേസ് പിൻവലിക്കാനുള്ള നീക്കത്തിലേക്ക് സർക്കാർ എത്തിയത്. അതേസമയം, തങ്ങൾ നിയമനടപടികളുമായി മുന്നോട്ടുപോകുമെന്ന് പാട്ടിന്റെ അണിയറ പ്രവർത്തകർ നേരത്തെ വ്യക്തമാക്കിയിരുന്നു. സർക്കാരിന്റെ ഈ പുതിയ നീക്കം രാഷ്ട്രീയ കേന്ദ്രങ്ങളിൽ വലിയ ചർച്ചയാകുമെന്നുറപ്പാണ്.
