ലൈംഗികാതിക്രമക്കേസിൽ മുൻ എംഎൽഎയും പ്രശസ്ത സംവിധായകനുമായ പി.ടി കുഞ്ഞുമുഹമ്മദിനെ തിരുവനന്തപുരം കന്റോൺമെന്റ് പൊലീസ് അറസ്റ്റ് ചെയ്തു. കോടതി നേരത്തെ ഉപാധികളോടെ മുൻകൂർ ജാമ്യം അനുവദിച്ചിരുന്നതിനാൽ, അറസ്റ്റ് രേഖപ്പെടുത്തിയ ശേഷം അദ്ദേഹത്തെ ജാമ്യത്തിൽ വിട്ടയച്ചു. ഇത് ഒരു സ്വാഭാവിക നിയമനടപടിയാണെന്ന് പൊലീസ് അറിയിച്ചു.
തിരുവനന്തപുരത്ത് നടന്ന അന്താരാഷ്ട്ര ചലച്ചിത്ര മേളയുടെ (IFFK) സ്ക്രീനിംഗുമായി ബന്ധപ്പെട്ട ചർച്ചകൾക്കായി നഗരത്തിലെ ഹോട്ടൽ മുറിയിലേക്ക് വിളിച്ചുവരുത്തി തന്നെ അപമര്യാദയായി പെരുമാറിയെന്നും ലൈംഗികമായി അതിക്രമിക്കാൻ ശ്രമിച്ചുവെന്നുമാണ് ഒരു യുവസംവിധായിക നൽകിയ പരാതി. പരാതിക്കാരി മുഖ്യമന്ത്രിക്ക് നൽകിയ പരാതിയുടെ അടിസ്ഥാനത്തിലാണ് പൊലീസ് കേസെടുത്തത്. സ്ത്രീത്വത്തെ അപമാനിക്കൽ, ലൈംഗികാതിക്രമം തുടങ്ങിയ വകുപ്പുകൾ ചേർത്താണ് കന്റോൺമെന്റ് പൊലീസ് കേസ് രജിസ്റ്റർ ചെയ്തിരുന്നത്.
എന്നാൽ തനിക്കെതിരെയുള്ള ആരോപണങ്ങൾ പി.ടി കുഞ്ഞുമുഹമ്മദ് നിഷേധിച്ചു. താൻ ആരോടും അപമര്യാദയായി പെരുമാറിയിട്ടില്ലെന്നും പരാതിക്കാരിക്ക് എന്തെങ്കിലും തരത്തിലുള്ള തെറ്റിദ്ധാരണ ഉണ്ടായതാകാമെന്നുമാണ് അദ്ദേഹത്തിന്റെ നിലപാട്. കോടതിയുടെ നിർദ്ദേശപ്രകാരം ഏഴു ദിവസത്തിനുള്ളിൽ അന്വേഷണ ഉദ്യോഗസ്ഥന് മുന്നിൽ ഹാജരാകണമെന്ന വ്യവസ്ഥയുടെ അടിസ്ഥാനത്തിലാണ് അദ്ദേഹം സ്റ്റേഷനിലെത്തിയത്.
