ഡൽഹി ചെങ്കോട്ട സ്ഫോടനക്കേസുമായി ബന്ധപ്പെട്ട് അറസ്റ്റിലായ വനിതാ ഡോക്ടർ ഷഹീൻ സായിദ്, ഭീകരസംഘടനയായ ജയ്ഷെ മുഹമ്മദിന്റെ വനിതാ വിഭാഗമായ 'ജമാഅത്തുൽ മുഅ്മിനാത്തി'ന്റെ ഇന്ത്യയിലെ നേതാവാണെന്ന് പൊലീസ് വെളിപ്പെടുത്തി. രാജ്യത്തെ നാല് പ്രധാന നഗരങ്ങളിൽ വൻ സ്ഫോടനങ്ങൾ നടത്താൻ ഇവർ പദ്ധതിയിട്ടിരുന്നതായും പൊലീസ് കണ്ടെത്തി.
കഴിഞ്ഞ ദിവസം അറസ്റ്റിലായ ഷഹീൻ സായിദിനെ ചോദ്യം ചെയ്തതിൽ നിന്നാണ് ഈ ഞെട്ടിക്കുന്ന വിവരങ്ങൾ പുറത്തുവന്നത്. ഡൽഹിയിലെ ട്രാഫിക് സിഗ്നലിൽ നിർത്തിയിട്ടിരുന്ന ഒരു ഐ20 കാറാണ് സ്ഫോടനത്തിൽ തകർന്നത്. ഈ സ്ഫോടനത്തിൽ 12 പേർ മരണപ്പെടുകയും നിരവധി പേർക്ക് പരിക്കേൽക്കുകയും ചെയ്തിരുന്നു.
സ്ഫോടനത്തിനായി 32 കാറുകൾ തയ്യാറാക്കിയിരുന്നതായും പൊലീസ് പറഞ്ഞു. ഡൽഹിയിൽ നിന്ന് കുറഞ്ഞ വിലയ്ക്ക് പഴയ മോഡൽ കാറുകൾ വാങ്ങി, അതിൽ സ്ഫോടകവസ്തുക്കൾ നിറച്ച് രാജ്യത്തെ വിവിധ നഗരങ്ങളിൽ സ്ഫോടനം നടത്താനായിരുന്നു പദ്ധതി. കഴിഞ്ഞ ദിവസം ഹരിയാനയിലെ ഫരീദാബാദിൽ നിന്ന് പിടിച്ചെടുത്ത ചുവന്ന 'ഇക്കോ സ്പോർട്ട്', 'സ്വിഫ്റ്റ് ഡിസയർ' ഉൾപ്പെടെയുള്ള കാറുകൾ ഈ പദ്ധതിയുടെ ഭാഗമാണെന്നും പോലീസ് അറിയിച്ചു.
പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്‌നാഥ് സിംഗ്, ഐടി-റെയിൽവേ മന്ത്രി അശ്വിനി വൈഷ്ണവ് എന്നിവരുടെ നേതൃത്വത്തിൽ ചേർന്ന ഉന്നതതല യോഗത്തിലാണ് ഈ വിവരങ്ങൾ ചർച്ച ചെയ്തത്. ഭീകരവാദത്തെ ഒരു കാരണവശാലും വെച്ചുപൊറുപ്പിക്കില്ലെന്നും, എന്തു വിലകൊടുത്തും ചെറുക്കുമെന്നും അശ്വിനി വൈഷ്ണവ് വ്യക്തമാക്കിയിരുന്നു.
ഡിസംബർ 6-ന് ബാബറി മസ്ജിദ് തകർത്തതിന്റെ വാർഷിക ദിനത്തിൽ രാജ്യത്ത് വൻ സ്ഫോടനം നടത്താനായിരുന്നു ഇവരുടെ പദ്ധതി എന്നും ചോദ്യം ചെയ്യലിൽ പോലീസ് കണ്ടെത്തിയിട്ടുണ്ട്. ഈ ഭീകരപ്രവർത്തനത്തെക്കുറിച്ച് കൂടുതൽ അന്വേഷണം നടന്നുവരികയാണ്. ഫൈസൽ അസീസ് ആണ് ഈ വാർത്ത റിപ്പോർട്ട് ചെയ്തത്.
