വയനാട് ജില്ലാ കോൺഗ്രസ് കമ്മിറ്റി (ഡി.സി.സി.) പ്രസിഡന്റ് എൻ.ഡി. അപ്പച്ചൻ സ്ഥാനം രാജിവെച്ചു. പാർട്ടിയിലെ വിഭാഗീയത രൂക്ഷമായതിനെത്തുടർന്ന് കെ.പി.സി.സി. (കേരള പ്രദേശ് കോൺഗ്രസ് കമ്മിറ്റി) നേതൃത്വത്തിന്റെ നിർദ്ദേശപ്രകാരമാണ് രാജി. പകരമായി കൽപ്പറ്റ നഗരസഭാ അധ്യക്ഷൻ ടി.ജെ. ഐസക്കിന് താൽക്കാലിക ചുമതല നൽകിയിട്ടുണ്ട്.
തന്റെ രാജിക്ക് പിന്നിലെ കാരണങ്ങൾ കോൺഗ്രസ് നേതൃത്വം വ്യക്തമാക്കുമെന്നാണ് എൻ.ഡി. അപ്പച്ചൻ മാധ്യമങ്ങളോട് പ്രതികരിച്ചത്. എന്നാൽ, വ്യക്തിപരമായ കാരണങ്ങളാലാണ് രാജിയെന്നാണ് കെ.പി.സി.സി. നേതൃത്വം വിശദീകരിക്കുന്നത്.
പ്രിയങ്കാ ഗാന്ധിയുടെ മണ്ഡലമായ വയനാട്ടിൽ പാർട്ടിക്കുള്ളിലെ സംഘടനാ സംവിധാനം ദുർബലമാണെന്നും, വായ്പാ കുടിശ്ശിക, നിയമന വിവാദങ്ങൾ തുടങ്ങിയ വിഷയങ്ങളിൽ പാർട്ടി പ്രതിസന്ധിയിലാണെന്നും ഹൈക്കമാൻഡ് അതൃപ്തി അറിയിച്ചിരുന്നു. കഴിഞ്ഞ ഡി.സി.സി. നേതൃയോഗത്തിൽ എ.ഐ.സി.സി. ജനറൽ സെക്രട്ടറി കെ.സി. വേണുഗോപാൽ നേരിട്ട് പങ്കെടുക്കുകയും, പ്രശ്നങ്ങൾ അടിയന്തരമായി പരിഹരിച്ചില്ലെങ്കിൽ കർശന നടപടികളിലേക്ക് നീങ്ങുമെന്ന് മുന്നറിയിപ്പ് നൽകുകയും ചെയ്തിരുന്നു. ഈ സാഹചര്യത്തിലാണ് എൻ.ഡി. അപ്പച്ചന്റെ രാജി.പുതിയ ഡി.സി.സി. പ്രസിഡന്റിനെ വൈകാതെ തന്നെ ഹൈക്കമാൻഡ് പ്രഖ്യാപിക്കുമെന്നാണ് സൂചന.
