ഇന്ത്യയും ചൈനയും തമ്മിലുള്ള അഭിപ്രായ വ്യത്യാസങ്ങൾ തർക്കങ്ങളായി മാറരുതെന്ന് വിദേശകാര്യ മന്ത്രി എസ്. ജയശങ്കർ. ന്യൂഡൽഹിയിൽ വെച്ച് ചൈനീസ് വിദേശകാര്യ മന്ത്രി വാങ് യീയുമായി നടത്തിയ കൂടിക്കാഴ്ചയിലാണ് അദ്ദേഹം ഇക്കാര്യം വ്യക്തമാക്കിയത്. അതിർത്തിയിലെ പ്രശ്നങ്ങൾ പരിഹരിച്ച് ഉഭയകക്ഷി ബന്ധം സാധാരണ നിലയിലാക്കേണ്ടതിന്റെ പ്രാധാന്യം ഇന്ത്യ ചർച്ചയിൽ ഊന്നിപ്പറഞ്ഞു.
2020-ൽ ലഡാക്കിലെ ഗാൽവാൻ താഴ്‌വരയിലുണ്ടായ സൈനിക ഏറ്റുമുട്ടലിന് ശേഷം ഇരുരാജ്യങ്ങളും തമ്മിലുള്ള ബന്ധത്തിൽ നിലനിൽക്കുന്ന അകലം കുറയ്ക്കുക എന്ന ലക്ഷ്യത്തോടെയാണ് ചർച്ച നടന്നത്. അതിർത്തിയിൽ നിന്ന് സൈന്യത്തെ പിൻവലിക്കുന്നത് സംബന്ധിച്ച് നേരത്തെ നടന്ന നയതന്ത്ര ചർച്ചകളുടെ തുടർച്ചയായാണ് വാങ് യീയുടെ ഇന്ത്യൻ സന്ദർശനം.
ഇരുരാജ്യങ്ങളുടെയും താൽപര്യങ്ങൾ സംരക്ഷിച്ചും ആശങ്കകൾ പരിഹരിച്ചും മുന്നോട്ടുപോകണമെന്ന് ജയശങ്കർ പറഞ്ഞു. ഭാവിയുടെ ബന്ധം കെട്ടിപ്പടുക്കുന്നതിന് നിലവിലെ പ്രശ്നങ്ങൾക്ക് പരിഹാരം കാണേണ്ടത് അത്യാവശ്യമാണെന്നും അദ്ദേഹം കൂട്ടിച്ചേർത്തു.
ചൈനീസ് വിദേശകാര്യ മന്ത്രി, ദേശീയ സുരക്ഷാ ഉപദേഷ്ടാവ് അജിത് ഡോവലുമായും ഇന്ന് കൂടിക്കാഴ്ച നടത്തും. അതിർത്തി തർക്കങ്ങൾ പരിഹരിക്കുന്നതിനുള്ള നിർണായക ചർച്ചകൾ ഈ യോഗത്തിലും ഉണ്ടാകുമെന്നാണ് പ്രതീക്ഷിക്കുന്നത്.
