ബി.ജെ.പി. സംസ്ഥാന വൈസ് പ്രസിഡന്റും മുതിർന്ന നേതാവുമായ സി. കൃഷ്ണകുമാറിനെതിരെ ലൈംഗിക പീഡന പരാതിയുമായി പാലക്കാട് സ്വദേശിനിയായ യുവതി രംഗത്ത്. ബി.ജെ.പി. സംസ്ഥാന അധ്യക്ഷൻ രാജീവ് ചന്ദ്രശേഖരന് ഇമെയിലിലൂടെയാണ് യുവതി പരാതി നൽകിയത്. അതേസമയം, ആരോപണങ്ങൾ പൂർണമായി നിഷേധിച്ച് സി. കൃഷ്ണകുമാർ രംഗത്തെത്തി. പാർട്ടി വിട്ടുപോയവരുടെ ഗൂഢാലോചനയാണ് ഇതിന് പിന്നിലെന്നും നിയമനടപടി സ്വീകരിക്കുമെന്നും അദ്ദേഹം അറിയിച്ചു.
ഇന്ന് രാവിലെയാണ് ഈ വാർത്ത പുറത്തുവന്നതെങ്കിലും, കഴിഞ്ഞ ദിവസമാണ് യുവതി ബി.ജെ.പി. സംസ്ഥാന അധ്യക്ഷന് പരാതി കൈമാറിയത്. സി. കൃഷ്ണകുമാർ തന്നെ ലൈംഗികമായി പീഡിപ്പിച്ചുവെന്നും ഈ വിഷയത്തിൽ അടിയന്തര നടപടി സ്വീകരിക്കണമെന്നുമാണ് യുവതിയുടെ ആവശ്യം.
മുൻപും ഈ വിഷയത്തിൽ താൻ വി. മുരളീധരൻ അടക്കമുള്ള ബി.ജെ.പി. നേതാക്കളെയും ആർ.എസ്.എസ്. സംസ്ഥാന നേതൃത്വത്തിലെ ഗോവിന്ദൻ അടക്കമുള്ളവരെയും സമീപിച്ചിരുന്നതായും എന്നാൽ നടപടിയുണ്ടാകുമെന്ന് ഉറപ്പ് നൽകിയതല്ലാതെ ഒന്നും സംഭവിച്ചില്ലെന്നും യുവതി പരാതിയിൽ പറയുന്നു. ഈ സാഹചര്യത്തിലാണ് സംസ്ഥാന അധ്യക്ഷൻ രാജീവ് ചന്ദ്രശേഖരനെ വീണ്ടും സമീപിച്ചത്.
രാജീവ് ചന്ദ്രശേഖരന്റെ ഓഫീസ് പരാതി ലഭിച്ചതായി സ്ഥിരീകരിച്ചിട്ടുണ്ട്. നിലവിൽ ബെംഗളൂരുവിലുള്ള രാജീവ് ചന്ദ്രശേഖരൻ മടങ്ങിയെത്തിയ ശേഷം തുടർനടപടികൾ സ്വീകരിക്കുമെന്ന് യുവതിക്ക് മറുപടിയായി ഇമെയിൽ അയക്കുകയും ചെയ്തു.
തനിക്കെതിരെയുള്ള ആരോപണങ്ങൾ അടിസ്ഥാനരഹിതമാണെന്ന് സി. കൃഷ്ണകുമാർ വാർത്താ സമ്മേളനത്തിൽ വ്യക്തമാക്കി. പരാതിക്കാരി തന്റെ അടുത്ത ബന്ധുവാണെന്നും ഭാര്യയുടെ വീട്ടിലെ സ്വത്ത് തർക്കവുമായി ബന്ധപ്പെട്ട ഒരു കേസ് 2023-ൽ നടന്നിരുന്നതായും അതിൽ തനിക്ക് അനുകൂലമായ വിധിയാണ് വന്നതെന്നും അദ്ദേഹം പറഞ്ഞു. ഈ ഭൂമി തർക്കമാണ് ഇപ്പോഴത്തെ ആരോപണങ്ങൾക്ക് പിന്നിൽ.
പാർട്ടിയിൽ നിന്ന് പുറത്താക്കപ്പെട്ട സന്ദീപ് വാര്യരാണ് ഈ ആരോപണങ്ങൾക്ക് പിന്നിലെ 'അസുരവിത്ത്' എന്നും സി. കൃഷ്ണകുമാർ ആരോപിച്ചു. രാഹുൽ മാങ്കൂട്ടത്തിനെതിരായ സമരത്തിൽ നിന്ന് ജനശ്രദ്ധ തിരിക്കുന്നതിനും ഈ ആരോപണങ്ങൾ ലക്ഷ്യമിടുന്നുണ്ടെന്നും അദ്ദേഹം കൂട്ടിച്ചേർത്തു. ഈ വിഷയത്തിൽ മാനനഷ്ടത്തിന് കേസ് ഫയൽ ചെയ്യുമെന്നും സി. കൃഷ്ണകുമാർ അറിയിച്ചു.
സി. കൃഷ്ണകുമാറിനെതിരെ ഉയർന്ന പരാതി ബി.ജെ.പി. സംസ്ഥാന രാഷ്ട്രീയത്തിൽ പുതിയ വിവാദങ്ങൾക്ക് തിരികൊളുത്തിയിരിക്കുകയാണ്.
