വിമാനങ്ങളുടെ സോഫ്റ്റുവെയറില്‍ അടിയന്തര പുതുക്കലിന് നിര്‍ദേശം നല്‍കി വിമാനനിര്‍മ്മാണ കമ്പനിയായ എയര്‍ബസ്. സൗര വികിരണങ്ങള്‍ വിമാനങ്ങളിലെ ഫ്‌ളൈറ്റ് ഡേറ്റകള്‍ തകരാറിലാക്കുമെന്ന കണ്ടെത്തലിന്റെ അടിസ്ഥാനത്തിലാണ് നിര്‍ദേശം. എ320 മോഡല്‍ വിഭാഗത്തില്‍പ്പെട്ട വിമാനങ്ങളില്‍ സോഫ്റ്റ്വെയര്‍ അല്ലെങ്കില്‍ ഹാര്‍ഡ്വെയര്‍ അപ്ഗ്രഡേഷന്‍ നടത്തണമെന്നാണ് നിര്‍ദേശം. ആറായിരത്തോളം വിമാനങ്ങളിലാണ് സോഫ്റ്റ് വെയര്‍ പുതുക്കുന്നത്. ഇതോടെ ലോക വ്യാപകമായി സര്‍വ്വീസ് നടത്തുന്ന എയര്‍ബസിന്റെ എ320 മോഡല്‍ വിമാനങ്ങളുടെ ആയിരക്കണക്കിന് സര്‍വീസ് തടസ്സപ്പെടാന്‍ സാധ്യതയുണ്ട്. ഇന്ത്യയില്‍ 300 ഓളം വിമാന സര്‍വ്വീസുകളെ ബാധിക്കും. ഇന്‍ഡിഗോയുടെ 350 വിമാനങ്ങളും എയര്‍ ഇന്ത്യയുടെ 120 വിമാനങ്ങളും എ320 ശ്രേണിയില്‍പ്പെട്ടതാണ്. എയര്‍ ഇന്ത്യ എക്‌സ്പ്രസിന് 40 വിമാനങ്ങളുമുണ്ട്.
