യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിലിനെതിരായ ലൈംഗിക പീഡന പരാതിയിൽ പൊലീസ് അന്വേഷണം ഊർജിതമാക്കി. കേസിൽ ശാസ്ത്രീയ തെളിവുകൾ ശേഖരിക്കുന്നതിന്റെ ഭാഗമായി പരാതിക്കാരിയായ യുവതിയെ ചികിത്സിച്ച ഡോക്ടറുടെ മൊഴി രേഖപ്പെടുത്താനാണ് അന്വേഷണ സംഘത്തിന്റെ നീക്കം.
രാഹുൽ നൽകിയ മരുന്ന് കഴിച്ചതിനെ തുടർന്ന് ശാരീരിക അസ്വസ്ഥതകൾ ഉണ്ടായെന്നും, ഇതിനെത്തുടർന്ന് തിരുവനന്തപുരത്തെ സർക്കാർ ആശുപത്രിയിൽ ചികിത്സ തേടിയെന്നും യുവതി പൊലീസിന് മൊഴി നൽകിയിരുന്നു. ഈ സാഹചര്യത്തിലാണ് ചികിത്സിച്ച ഡോക്ടറുടെ മൊഴി കേസിൽ നിർണ്ണായകമാകുന്നത്. നിർബന്ധിത ഗർഭഛിദ്രം നടത്തിയെന്നതടക്കമുള്ള ഗുരുതരമായ ആരോപണങ്ങളാണ് രാഹുലിനെതിരെ ഉയർന്നിട്ടുള്ളത്.
സംഭവത്തെക്കുറിച്ച് അറിവുള്ള യുവതിയുടെ സുഹൃത്തുക്കളുടെ മൊഴിയും അന്വേഷണ സംഘം വരും ദിവസങ്ങളിൽ രേഖപ്പെടുത്തും. നേരത്തെ രാഹുലിനെതിരെ ആരോപണങ്ങൾ ഉയർന്നപ്പോൾ രൂപീകരിച്ച പ്രത്യേക അന്വേഷണ സംഘം വിവരങ്ങൾ ശേഖരിച്ചിരുന്നെങ്കിലും, പരാതി ഇല്ലാതിരുന്നതിനാൽ മൊഴിയെടുക്കൽ നടപടികളിലേക്ക് കടന്നിരുന്നില്ല. എന്നാൽ ഔദ്യോഗിക പരാതി ലഭിച്ച സാഹചര്യത്തിൽ സാക്ഷിമൊഴികൾ വേഗത്തിൽ രേഖപ്പെടുത്തി മുന്നോട്ടുപോകാനാണ് പൊലീസിന്റെ തീരുമാനം.
അതേസമയം, രാഹുൽ മാങ്കൂട്ടത്തിലിന്റെ മുൻകൂർ ജാമ്യാപേക്ഷ തിങ്കളാഴ്ച കോടതി പരിഗണിക്കും. ജാമ്യാപേക്ഷ നിലനിൽക്കുന്നതിനാൽ ഉടനടി അറസ്റ്റ് ഉണ്ടായേക്കില്ലെന്നാണ് സൂചന. രാഹുൽ പാലക്കാട് ജില്ല വിട്ടുപോയിട്ടില്ലെന്നാണ് പൊലീസിന്റെ പ്രാഥമിക നിഗമനം. തിങ്കളാഴ്ച കോടതി സ്വീകരിക്കുന്ന നിലപാട് അനുസരിച്ചാകും പൊലീസിന്റെ തുടർനടപടികൾ.
