ശബരിമലയിലെ സ്വർണ്ണക്കവർച്ചയ്ക്ക് പിന്നിൽ 500 കോടിയുടെ ഇടപാട് നടന്നിട്ടുണ്ടെന്നും ഇതിൽ അന്താരാഷ്ട്ര പുരാവസ്തു കള്ളക്കടത്ത് സംഘത്തിന് പങ്കുണ്ടോ എന്ന് അന്വേഷിക്കണമെന്നും ആവശ്യപ്പെട്ട് മുതിർന്ന കോൺഗ്രസ് നേതാവ് രമേശ് ചെന്നിത്തല രംഗത്ത്. ഇക്കാര്യം ചൂണ്ടിക്കാട്ടി അദ്ദേഹം പ്രത്യേക അന്വേഷണ സംഘത്തിൻ്റെ ചുമതലയുള്ള എഡിജിപി എച്ച്. വെങ്കിടേഷിന് കത്തുനൽകി.
ശബരിമല ക്ഷേത്രത്തിലെ സ്വർണ്ണപ്പാളികൾ കവർന്ന സംഭവത്തിൽ അന്താരാഷ്ട്ര പുരാവസ്തു കള്ളക്കടത്ത് സംഘത്തിൻ്റെ ഇടപെടൽ സംശയിക്കുന്നതായി ചെന്നിത്തല ആരോപിച്ചു. താൻ നടത്തിയ സ്വതന്ത്ര അന്വേഷണത്തിൽ ഇതുമായി ബന്ധപ്പെട്ട ചില നിർണ്ണായക വിവരങ്ങളും രേഖകളും ലഭിച്ചിട്ടുണ്ടെന്നും അദ്ദേഹം കത്തിൽ സൂചിപ്പിക്കുന്നു. ഈ വിവരങ്ങൾ അന്വേഷണ സംഘത്തിന് കൈമാറാൻ തയ്യാറാണെന്നും അദ്ദേഹം അറിയിച്ചു.
പുരാവസ്തു കള്ളക്കടത്ത് സംഘം ദേവസ്വം ബോർഡിലെ ചില ഉന്നതരുമായി ബന്ധം സ്ഥാപിച്ച് നടത്തിയ ഗൂഢാലോചനയാണ് ഇതിന് പിന്നിലെന്നും ചെന്നിത്തല ആരോപിക്കുന്നു. ശബരിമലയിലെ സ്വർണ്ണപ്പാളികൾക്ക് പുരാവസ്തു എന്ന നിലയിലുള്ള മൂല്യം കണക്കിലെടുത്താണ് ഇത്രയും വലിയ തുകയുടെ ഇടപാട് നടന്നതെന്നാണ് അദ്ദേഹത്തിൻ്റെ നിഗമനം. ഈ വിഷയത്തിൽ സമഗ്രമായ അന്വേഷണം വേണമെന്നും, തെളിവുകൾ മറ്റ് ഏജൻസികൾക്ക് നൽകാൻ തയ്യാറാണെന്നും അദ്ദേഹം വ്യക്തമാക്കി. തദ്ദേശ തെരഞ്ഞെടുപ്പ് അടുത്തിരിക്കുന്ന സാഹചര്യത്തിൽ ഈ ആരോപണം സർക്കാരിനെ പ്രതിരോധത്തിലാക്കിയേക്കാം.
