ഭൂട്ടാനിൽനിന്ന് നികുതി വെട്ടിച്ച് ആഡംബര വാഹനങ്ങൾ അനധികൃതമായി ഇറക്കുമതി ചെയ്തതുമായി ബന്ധപ്പെട്ട് കസ്റ്റംസ് 'ഓപ്പറേഷൻ നുംഖോർ' എന്ന പേരിൽ അന്വേഷണം ഊർജ്ജിതമാക്കി. മലയാളത്തിലെ പ്രമുഖ നടന്മാരായ ദുൽഖർ സൽമാൻ, അമിത് ചക്കാലക്കൽ എന്നിവർക്ക് കസ്റ്റംസ് ചോദ്യം ചെയ്യലിന് നോട്ടീസ് അയച്ചു. ദുൽഖർ സൽമാന്റെ ഉടമസ്ഥതയിലുള്ള രണ്ട് വാഹനങ്ങൾ കസ്റ്റഡിയിലെടുക്കുകയും അദ്ദേഹത്തിന്റെ മറ്റ് വാഹനങ്ങളുടെ രേഖകൾ പരിശോധിക്കുകയും ചെയ്യും.
ഈ കേസിൽ അമിത് ചക്കാലക്കലിന്റെ വാഹനങ്ങളെക്കുറിച്ചും അന്വേഷണം വ്യാപിപ്പിച്ചു. കസ്റ്റംസ് സമൻസ് കൈപ്പറ്റാൻ ആദ്യം വിസമ്മതിച്ചെങ്കിലും പിന്നീട് അമിത് ചക്കാലക്കൽ അന്വേഷണവുമായി സഹകരിക്കുന്നുണ്ടെന്ന് റിപ്പോർട്ടുകൾ പറയുന്നു. അമിത് ചക്കാലക്കലിന്റെ വാഹനം മധ്യപ്രദേശ് രജിസ്ട്രേഷനിലാണ്. താൻ രാജ്യത്തുടനീളം യാത്ര ചെയ്യാറുണ്ടെന്നും കേരളാ രജിസ്ട്രേഷനിലുള്ള വാഹനങ്ങൾ പലപ്പോഴും പോലീസിന്റെ പരിശോധനയ്ക്ക് വിധേയമാകാറുണ്ടെന്നും അദ്ദേഹം കസ്റ്റംസിനെ അറിയിച്ചതായും വിവരമുണ്ട്.
ഭൂട്ടാൻ സൈന്യം ലേലത്തിൽ വിറ്റ വാഹനങ്ങൾ ഒരു ലക്ഷം മുതൽ മൂന്ന് ലക്ഷം വരെ രൂപയ്ക്ക് വാങ്ങി, അനധികൃതമായി ഇന്ത്യയിലേക്ക് കടത്തി, വ്യാജരേഖകൾ ചമച്ച് (ഇന്ത്യൻ, അമേരിക്കൻ എംബസികളുടെ പേരും സീലുകളും ഉൾപ്പെടെ) 30 ലക്ഷം മുതൽ 50 ലക്ഷം വരെ രൂപയ്ക്ക് മറിച്ചു വിറ്റെന്നാണ് കസ്റ്റംസ് കണ്ടെത്തൽ. കേരളത്തിൽ മാത്രം 150-200 ഓളം അനധികൃത വാഹനങ്ങൾ ഉണ്ടെന്നാണ് കസ്റ്റംസിന്റെ നിഗമനം. നിലവിൽ 36 വാഹനങ്ങൾ കേരളത്തിൽ നിന്ന് പിടിച്ചെടുത്തിട്ടുണ്ട്.
കള്ളപ്പണം വെളുപ്പിക്കൽ അടക്കമുള്ള കാര്യങ്ങൾ നടന്നിട്ടുണ്ടോ എന്ന് കണ്ടെത്താൻ എൻഫോഴ്സ്മെന്റ് ഡയറക്ടറേറ്റ് (ഇ.ഡി.) ഈ കേസിൽ ഇടപെടാൻ സാധ്യതയുണ്ടെന്നും കസ്റ്റംസ് കമ്മിഷണർ ടിജു തോമസ് അറിയിച്ചു.വ്യാജരേഖകൾ ഉപയോഗിച്ചുള്ള ഇത്തരം വാഹനക്കടത്ത് രാജ്യസുരക്ഷയ്ക്ക് ഭീഷണിയാണെന്നും അദ്ദേഹം കൂട്ടിച്ചേർത്തു. വാഹനങ്ങളുടെ രജിസ്ട്രേഷൻ, ഫിറ്റ്നസ് സർട്ടിഫിക്കറ്റുകൾ, ഇൻഷുറൻസ് എന്നിവ പലതിനും ഇല്ലായിരുന്നു. കൂടാതെ, ജി.എസ്.ടി. തട്ടിപ്പും പരീവാഹൻ വെബ്സൈറ്റിലെ രേഖകളിൽ കൃത്രിമം കാണിച്ചതും അന്വേഷണത്തിൽ കണ്ടെത്തിയിട്ടുണ്ട്.
