കാഠ്മണ്ഡു: ഫെയ്സ്ബുക്ക്, എക്സ്, ഇന്സ്റ്റഗ്രാം, യൂട്യൂബ് എന്നിവയുള്പ്പെടെ 26 സോഷ്യല് മീഡിയ പ്ലാറ്റ്ഫോമുകള്ക്ക് നിരോധനം ഏര്പ്പെടുത്തി നേപ്പാള് സര്ക്കാര്. നേപ്പാളിലെ രജിസ്ട്രേഷന് നടപടികള് പൂര്ത്തിയാക്കുന്നതിനുള്ള സമയപരിധി പാലിക്കുന്നതില് പരാജയപ്പെട്ടതിനെ തുടര്ന്നാണ് കെ.പി. ശര്മ്മ ഒലി സര്ക്കാരിന്റെ നടപടി.
'രജിസ്റ്റര് ചെയ്യാത്ത എല്ലാ സോഷ്യല് മീഡിയ സൈറ്റുകളും രജിസ്റ്റര് ചെയ്യുന്നതുവരെ പ്രവര്ത്തനരഹിതമാക്കാന് നേപ്പാള് ടെലികമ്മ്യൂണിക്കേഷന് അതോറിറ്റിക്ക് നിര്ദ്ദേശം നല്കിയിട്ടുണ്ട്.' നേപ്പാള് വാര്ത്താവിനിമയ, വിവരസാങ്കേതിക മന്ത്രാലയം അറിയിപ്പിലൂടെ വ്യക്തമാക്കി. ആവര്ത്തിച്ചുള്ള അഭ്യര്ത്ഥനകളെത്തുടര്ന്ന്, സോഷ്യല് മീഡിയ പ്ലാറ്റ്ഫോമുകള്ക്ക് നേപ്പാളില് രജിസ്റ്റര് ചെയ്യുന്നതിനായി ഓഗസ്റ്റ് 28-ന് സര്ക്കാര് ഏഴ് ദിവസത്തെ സമയപരിധി നിശ്ചയിച്ചിരുന്നു. ആ സമയപരിധി ബുധനാഴ്ച രാത്രി അവസാനിച്ചതോടെയാണ് നടപടി.വിയോജിപ്പുകളെ നിശ്ശബ്ദമാക്കാനുള്ള ശ്രമമാണെന്ന് ആരോപിച്ച് നേപ്പാള് സര്ക്കാരിനെതിരെ ഒരു വിഭാഗം ആക്ടിവിസ്റ്റുകള് രംഗത്തെത്തിയിട്ടുണ്ട്.
