ഉപരാഷ്ട്രപതി തിരഞ്ഞെടുപ്പിൽ മത്സരിക്കുന്ന പ്രതിപക്ഷ 'ഇന്ത്യാ' സഖ്യത്തിന്റെ സ്ഥാനാർത്ഥിയെ ഇന്ന് പ്രഖ്യാപിക്കും. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ ഉച്ചയ്ക്ക് ചേരുന്ന നിർണായക യോഗത്തിന് ശേഷമാകും സ്ഥാനാർത്ഥിയെ ഔദ്യോഗികമായി പ്രഖ്യാപിക്കുക.
മുതിർന്ന ഐ.എസ്.ആർ.ഒ ശാസ്ത്രജ്ഞനും തമിഴ്നാട് സ്വദേശിയുമായ മയിൽസ്വാമി അണ്ണാദുരൈ, മഹാത്മാ ഗാന്ധിയുടെ കൊച്ചുമകൻ തുഷാർ ഗാന്ധി എന്നിവരുടെ പേരുകളാണ് സഖ്യത്തിന്റെ സജീവ പരിഗണനയിലുള്ളത്.
അതേസമയം, സ്ഥാനാർത്ഥി നിർണയത്തിൽ സഖ്യത്തിനുള്ളിൽ ഭിന്നതകളും രൂപപ്പെട്ടിട്ടുണ്ട്. എൻ.ഡി.എ സ്ഥാനാർത്ഥി തമിഴ്നാട്ടിൽ നിന്നുള്ള സി.പി. രാധാകൃഷ്ണൻ ആയതിനാൽ, അതേ സംസ്ഥാനത്തുനിന്നുള്ള സ്ഥാനാർത്ഥി വേണ്ടെന്നാണ് തൃണമൂൽ കോൺഗ്രസിന്റെ നിലപാട്. ഇത് "തമിഴ്നാടും തമിഴ്നാടും" തമ്മിലുള്ള മത്സരമായി മാറുമെന്നും, പകരം ഒരു ദളിത് സ്ഥാനാർത്ഥിയെ പരിഗണിക്കണമെന്നുമാണ് തൃണമൂൽ കോൺഗ്രസ് ആവശ്യപ്പെടുന്നത്.
ജാർഖണ്ഡ് ഗവർണറായിരുന്ന സി.പി. രാധാകൃഷ്ണനെയാണ് എൻ.ഡി.എ ഉപരാഷ്ട്രപതി സ്ഥാനാർത്ഥിയായി പ്രഖ്യാപിച്ചിരിക്കുന്നത്. എൻ.ഡി.എ സ്ഥാനാർത്ഥിക്കെതിരെ ഒറ്റക്കെട്ടായി മത്സരിക്കാനുള്ള പൊതുസ്ഥാനാർത്ഥിയെ കണ്ടെത്താനാണ് ഇന്ത്യാ സഖ്യത്തിന്റെ ശ്രമം. മല്ലികാർജുൻ ഖാർഗെയുടെ വസതിയിൽ ചേരുന്ന യോഗത്തിലെ ചർച്ചകൾക്ക് ശേഷമാകും അന്തിമ തീരുമാനം.
