266 ദിവസമായി സെക്രട്ടേറിയറ്റിന് മുന്നിൽ നടന്നുവന്ന ആശ വർക്കർമാരുടെ രാപ്പകൽ സമരം അവസാനിച്ചു. ഓണറേറിയം 1000 രൂപ വർദ്ധിപ്പിച്ചുകൊണ്ടുള്ള മുഖ്യമന്ത്രിയുടെ പ്രഖ്യാപനത്തെ സമരത്തിന്റെ ഭാഗിക വിജയമായി കാണുന്ന ആശ പ്രവർത്തകർ, സമരം പൂർണ്ണമായി അവസാനിപ്പിക്കുന്നില്ലെന്നും പ്രാദേശിക തലങ്ങളിലേക്ക് വ്യാപിപ്പിക്കുമെന്നും അറിയിച്ചു.
ആശ പ്രവർത്തകർക്ക് ഓണറേറിയം വർദ്ധിപ്പിക്കുക, പെൻഷൻ അനുവദിക്കുക, വിരമിക്കൽ ആനുകൂല്യം 21,000 രൂപയായി ഉയർത്തുക തുടങ്ങിയ വിവിധ ആവശ്യങ്ങൾ ഉന്നയിച്ചാണ് കേരള ഹെൽത്ത് വർക്കേഴ്സ് അസോസിയേഷന്റെ നേതൃത്വത്തിൽ സെക്രട്ടേറിയറ്റിന് മുന്നിൽ അനിശ്ചിതകാല സമരം നടന്നുവന്നത്. സമരസമിതിയുടെ ശക്തമായ പ്രതിഷേധങ്ങൾക്കൊടുവിലാണ് ആശ വർക്കർമാരുടെ ഓണറേറിയം 1000 രൂപ വർദ്ധിപ്പിക്കാൻ സർക്കാർ തീരുമാനിച്ചത്.
എന്നാൽ, ഈ വർദ്ധനവ് തങ്ങളുടെ ആവശ്യങ്ങൾക്ക് തികച്ചും അപര്യാപ്തമാണെന്ന് ആശ പ്രവർത്തകർ പറയുന്നു. 1000 രൂപയുടെ വർദ്ധനവ് ഒരു വലിയ വിജയമായി കണക്കാക്കുന്നില്ലെന്നും, 21,000 രൂപ ഓണറേറിയം നൽകുന്നതുവരെയും വിരമിക്കൽ ആനുകൂല്യങ്ങളും പെൻഷനും ഉൾപ്പെടെയുള്ള ആവശ്യങ്ങൾ അംഗീകരിക്കുന്നത് വരെയും സമരം തുടരുമെന്നും അവർ പ്രഖ്യാപിച്ചു. സംസ്ഥാനം ആവശ്യപ്പെട്ടതുകൊണ്ടാണ് കേന്ദ്രം ഓണറേറിയം വർദ്ധിപ്പിച്ചതെന്നും, അതൊരു വിജയമാണെന്നും ഒരു സമരസമിതി നേതാവ് ചൂണ്ടിക്കാട്ടി. 18 വർഷത്തിനിടയിൽ ആദ്യമായിട്ടാണ് ആശാപ്രവർത്തകർ ഇത്രയും കാലം ഒരുമിച്ച് സമരം നടത്തിയത്.
സമരകാലയളവിൽ നിരവധി ബുദ്ധിമുട്ടുകളാണ് ആശാ പ്രവർത്തകർക്ക് നേരിടേണ്ടി വന്നത്. മാർച്ച് 8-ലെ വനിതാ ദിനം, ഓണം, വിഷു, ആറ്റുകാൽ പൊങ്കാല തുടങ്ങിയ ആഘോഷ ദിവസങ്ങൾ പോലും സമരപ്പന്തലിൽ ചെലവഴിക്കേണ്ടി വന്നു. മഴയും വെയിലും വകവെക്കാതെ ഒരു ടാർപായ പോലും ഇല്ലാതെയാണ് അവർക്ക് സമരം ചെയ്യേണ്ടി വന്നത്. സൈബർ ആക്രമണങ്ങളും സ്ത്രീകളോടുള്ള ആക്ഷേപകരമായ പ്രസ്താവനകളും അവർക്ക് നേരിടേണ്ടി വന്നു. തങ്ങളുടെ ആവശ്യങ്ങൾ അംഗീകരിക്കുന്നത് വരെ പ്രാദേശിക തലങ്ങളിൽ സമരം കൂടുതൽ ശക്തമാക്കാനാണ് ആശ പ്രവർത്തകരുടെ തീരുമാനം.
