സംസ്ഥാനത്തിന്റെ പുതിയ പൊലീസ് മേധാവിയായി രവത ചന്ദ്രശേഖറെ നിയമിച്ചു. ഇന്ന് ചേർന്ന പ്രത്യേക മന്ത്രിസഭാ യോഗത്തിലാണ് ഇതുസംബന്ധിച്ച നിർണ്ണായക തീരുമാനം ഉണ്ടായത്. ഇതോടെ സംസ്ഥാനത്തിന്റെ 41-ാം പൊലീസ് മേധാവിയായാണ് രവത ചന്ദ്രശേഖർ ചുമതലയേൽക്കുന്നത്. 1991 ബാച്ചിലെ ഇന്ത്യൻ പൊലീസ് സർവീസ് (ഐപിഎസ്) ഉദ്യോഗസ്ഥനാണ് അദ്ദേഹം. ആന്ധ്രാപ്രദേശിലെ വെസ്റ്റ് ഗോദാവരി സ്വദേശിയാണ് രവത ചന്ദ്രശേഖർ. കേരള കേഡറിൽ സേവനം ആരംഭിച്ചത് തലശ്ശേരിയിൽ അസിസ്റ്റൻ്റ് സൂപ്രണ്ടൻ്റ് ഓഫ് പൊലീസ് (എഎസ്പി) ആയാണ്.
