കണ്ണൂർ: ജയിൽചാടിയ കൊടും കുറ്റവാളി ഗോവിന്ദച്ചാമിയെ കണ്ണൂർ നഗരത്തിൽ കണ്ടതായി നാട്ടുകാർ. സെൻട്രൽ ജയിലിൽ നിന്ന് ഏകദേശം രണ്ട് കിലോമീറ്റർ മാത്രം അകലെയുള്ള തളാപ്പ് എന്ന സ്ഥലത്തുവെച്ചാണ് ഗോവിന്ദച്ചാമിയോട് സാദൃശ്യമുള്ള ആളെ കണ്ടതെന്ന് നാട്ടുകാർ പോലീസിനെ അറിയിച്ചു. ഇതോടെ പോലീസ് പ്രദേശം വളഞ്ഞ് ഊർജിതമായ പരിശോധന ആരംഭിച്ചു.
നാട്ടുകാർ നൽകുന്ന വിവരമനുസരിച്ച്, സംശയാസ്പദമായ രീതിയിൽ കണ്ടയാൾക്ക് ഒരു കൈ ഉണ്ടായിരുന്നില്ല. ഈ കൈ മറ്റുള്ളവരിൽ നിന്ന് ഒളിച്ചുവെച്ച നിലയിലായിരുന്നു. ആളുകൾ ശ്രദ്ധിക്കുന്നതുകണ്ട് അടുത്തുകൂടിയപ്പോൾ ഇയാൾ ഓടിരക്ഷപ്പെട്ടെന്നും നാട്ടുകാർ പോലീസിന് മൊഴി നൽകിയിട്ടുണ്ട്.
ഗോവിന്ദച്ചാമി പോലീസ് പിടിയിലായതായി സ്ഥിരീകരിക്കാത്ത റിപ്പോർട്ടുകളുണ്ട്. എന്നാൽ, പോലീസ് ഇക്കാര്യം ഔദ്യോഗികമായി അറിയിച്ചിട്ടില്ല. തളാപ്പ് പ്രദേശം കേന്ദ്രീകരിച്ച് പോലീസ് വ്യാപകമായ തിരച്ചിൽ തുടരുകയാണ്. ജയിൽ ചാടി മണിക്കൂറുകൾക്കകം തന്നെ പ്രതിയെക്കുറിച്ചുള്ള നിർണായക വിവരം ലഭിച്ചത് പോലീസിന് ആശ്വാസമായിട്ടുണ്ട്.
വെള്ളിയാഴ്ച പുലർച്ചെയാണ് അതീവ സുരക്ഷാ ജയിലിന്റെ സെല്ലിന്റെ അഴികൾ മുറിച്ച് ഗോവിന്ദച്ചാമി രക്ഷപ്പെട്ടത്. സംഭവത്തിൽ സംസ്ഥാന വ്യാപകമായി പോലീസ് തിരച്ചിൽ നടത്തിവരികയായിരുന്നു.
