സംസ്ഥാനത്തെ സർക്കാർ മെഡിക്കൽ കോളേജ് ഡോക്ടർമാർ നടത്തുന്ന ഒപി ബഹിഷ്കരണ സമരത്തിൽ ഹൈക്കോടതി ഇടപെടുന്നു. സമരവുമായി ബന്ധപ്പെട്ട് സംസ്ഥാന സർക്കാരിനോട് കോടതി വിശദീകരണം തേടി. ചികിത്സ തേടിയെത്തുന്ന രോഗികളുടെ അവകാശങ്ങൾ യാതൊരു കാരണവശാലും നിഷേധിക്കപ്പെടരുതെന്ന് കോടതി കർശനമായി നിർദ്ദേശിച്ചു.
മെഡിക്കൽ സേവനങ്ങൾ കൃത്യമായി ലഭ്യമാക്കുക എന്നത് സർക്കാരിന്റെ ഉത്തരവാദിത്തമാണെന്നും ഒപി സേവനങ്ങൾക്ക് തടസ്സമില്ലെന്ന് സർക്കാർ ഉറപ്പുവരുത്തണമെന്നും ഹൈക്കോടതി വ്യക്തമാക്കി. ശമ്പള പരിഷ്കരണ കുടിശ്ശിക അനുവദിക്കുക, പുതിയ തസ്തികകൾ സൃഷ്ടിക്കുക തുടങ്ങിയ വിവിധ ആവശ്യങ്ങൾ ഉന്നയിച്ചാണ് ഡോക്ടർമാർ സമരം ചെയ്യുന്നത്.
ആവശ്യങ്ങൾ അംഗീകരിക്കാതെ സമരത്തിൽ നിന്ന് പിന്നോട്ടില്ലെന്ന നിലപാടിലാണ് ഡോക്ടർമാരുടെ സംഘടനകൾ. സമരം തുടരുന്ന സാഹചര്യത്തിൽ മെഡിക്കൽ കോളേജുകളുടെ പ്രവർത്തനം വലിയ പ്രതിസന്ധിയിലാണ്. നിലവിൽ പിജി ഡോക്ടർമാർ മാത്രമാണ് ഒപി വിഭാഗത്തിൽ സേവനം നൽകുന്നത്. സർക്കാരിന്റെ വിശദീകരണം ലഭിച്ച ശേഷം കോടതി വിഷയത്തിൽ കൂടുതൽ നടപടികൾ സ്വീകരിക്കും.
