തിരുവിതാംകൂർ ദേവസ്വം ബോർഡിന്റെ പുതിയ ഭരണസമിതി ഇന്ന് അധികാരമേൽക്കും. മുൻ ചീഫ് സെക്രട്ടറിയായിരുന്ന കെ. ജയകുമാർ പ്രസിഡന്റായും മുൻ വനം മന്ത്രി കെ. രാജു ബോർഡ് അംഗമായും ചുമതലയേൽക്കും. രാവിലെ 11:30-ന് ദേവസ്വം ബോർഡ് ആസ്ഥാനത്ത് വെച്ച് ഇരുവരും സത്യപ്രതിജ്ഞ ചെയ്യും.
രണ്ട് വർഷത്തേക്കാണ് പുതിയ ഭരണസമിതിയുടെ കാലാവധി. ശബരിമല സ്വർണ്ണപ്പാളി വിവാദത്തിന്റെ പശ്ചാത്തലത്തിൽ, നിലവിലെ ബോർഡ് പ്രസിഡന്റായിരുന്ന പി.എസ്. പ്രശാന്തും അംഗമായിരുന്ന എ. അജികുമാറും വ്യാഴാഴ്ച സ്ഥാനമൊഴിഞ്ഞിരുന്നു. ഈ സാഹചര്യത്തിലാണ് പുതിയ ഭരണസമിതി അധികാരമേൽക്കുന്നത്. രാഷ്ട്രീയത്തിന് പുറത്തുനിന്നുള്ള ഒരാളെ പ്രസിഡന്റാക്കാനാണ് സർക്കാർ തീരുമാനിച്ചത്.
കെ. ജയകുമാർ മുൻപ് ദേവസ്വം കമ്മീഷണറായും ആക്ടിംഗ് പ്രസിഡന്റായും പ്രവർത്തിച്ചിട്ടുണ്ട്. മലയാളം സർവകലാശാല വൈസ് ചാൻസലർ, ഐ.എം.ജി. ഡയറക്ടർ എന്നീ നിലകളിലും അദ്ദേഹം സേവനമനുഷ്ഠിച്ചിട്ടുണ്ട്. കവി, ഗാനരചയിതാവ്, വിവർത്തകൻ, ചിത്രകാരൻ, തിരക്കഥാകൃത്ത് എന്നീ നിലകളിലും കെ. ജയകുമാർ ശ്രദ്ധേയനാണ്. കെ. രാജു മുൻപ് വനം, വന്യജീവി, മൃഗസംരക്ഷണം, ക്ഷീരവികസന വകുപ്പ് മന്ത്രിയായിരുന്നു.
