ഇന്ത്യയും ന്യൂസിലാൻഡും തമ്മിൽ നിർണ്ണായകമായ സ്വതന്ത്ര വ്യാപാര കരാറിൽ (Free Trade Agreement) ഒപ്പുവെച്ചു. ഇരുരാജ്യങ്ങളും തമ്മിലുള്ള സാമ്പത്തിക ബന്ധങ്ങൾ കൂടുതൽ ആഴത്തിലാക്കാനും കയറ്റുമതിക്കാർക്ക് വിപണി പ്രവേശനം സുഗമമാക്കാനും ലക്ഷ്യമിട്ടുള്ളതാണ് ഈ കരാർ. പ്രധാനമന്ത്രി നരേന്ദ്ര മോദിയും ന്യൂസിലാൻഡ് പ്രധാനമന്ത്രി ക്രിസ്റ്റഫർ ലക്സണും ഈ നേട്ടത്തെ 'ചരിത്രപരം' എന്നാണ് വിശേഷിപ്പിച്ചത്.
അടുത്ത അഞ്ച് വർഷത്തിനുള്ളിൽ ഉഭയകക്ഷി വ്യാപാരം ഇരട്ടിയാക്കാനാണ് കരാറിലൂടെ ലക്ഷ്യമിടുന്നത്. കൂടാതെ, വരും വർഷങ്ങളിൽ ഏകദേശം 20 ബില്യൺ ഡോളറിന്റെ നിക്ഷേപം ന്യൂസിലാൻഡിൽ നിന്ന് ഇന്ത്യയിലേക്ക് പ്രതീക്ഷിക്കുന്നു. കരാർ യാഥാർത്ഥ്യമാകുന്നതോടെ ന്യൂസിലാൻഡിലേക്കുള്ള എല്ലാ ഇന്ത്യൻ ഉൽപ്പന്നങ്ങൾക്കും തീരുവയില്ലാതെ വിപണിയിൽ പ്രവേശിക്കാൻ സാധിക്കും എന്നത് വലിയ നേട്ടമാണ്.
2025 മാർച്ചിൽ ന്യൂസിലാൻഡ് പ്രധാനമന്ത്രി ക്രിസ്റ്റഫർ ലക്സൺ നടത്തിയ ഇന്ത്യ സന്ദർശന വേളയിലാണ് കരാറിനായുള്ള ചർച്ചകൾക്ക് വേഗത ലഭിച്ചത്. ഒൻപത് മാസത്തോളം നീണ്ടുനിന്ന ഔദ്യോഗിക ചർച്ചകൾക്കും വിവിധ റൗണ്ട് കൂടിക്കാഴ്ചകൾക്കും ശേഷമാണ് കരാർ അന്തിമരൂപത്തിലെത്തിയത്.
ഈ കരാർ ഇന്ത്യയിലെ കർഷകർക്കും ഡയറി മേഖലയ്ക്കും എംഎസ്എംഇ (MSME) യൂണിറ്റുകൾക്കും വലിയ ഗുണകരമാകുമെന്ന് കേന്ദ്ര മന്ത്രി പീയൂഷ് ഗോയൽ വ്യക്തമാക്കി. സാങ്കേതിക സഹകരണത്തിലൂടെ ഉൽപ്പന്നങ്ങളുടെ ഗുണനിലവാരവും ഉൽപാദനക്ഷമതയും വർദ്ധിപ്പിക്കാൻ ഇത് സഹായിക്കും. യുവാക്കൾക്കും സംരംഭകർക്കും പുതിയ തൊഴിലവസരങ്ങൾ സൃഷ്ടിക്കാനും ഈ വ്യാപാര കരാർ വഴിയൊരുക്കും.
