തൃശൂർ എടത്തിരുത്തിയിൽ വ്യാപാരി മരിച്ച നിലയിൽ. എടത്തിരുത്തി കുമ്പള പറമ്പ് സ്വദേശി തേക്കാനത്ത് വീട്ടിൽ മാത്യൂസ് (55) ആണ് മരിച്ചത്. വീട്ടുവളപ്പിലെ കുളത്തിലാണ് മൃതദേഹം കണ്ടെത്തിയത്. കൈ രണ്ടും തുണികൊണ്ട് കൂട്ടിക്കെട്ടിയ നിലയിലായിരുന്നു. മാത്യൂസ് ജീവനൊടുക്കിയെന്നാണ് പൊലീസിന്റെ പ്രാഥമിക നിഗമനം.
ഇന്ന് രാവിലെ മുതൽ മാത്യൂസിനെ കാണാതായിരുന്നു. തുടർന്ന് നാട്ടുകാരും കുടുംബാംഗങ്ങളും ചേർന്ന് വീടിന്റെ പരിസര പ്രദേശങ്ങളിൽ തെരച്ചിൽ നടത്തിയിരുന്നു. നാട്ടുകാർ നടത്തിയ അന്വേഷണത്തിലാണ് മാത്യൂസിനെ കുളത്തിൽ കൈബന്ധിച്ച് ചലനമറ്റ നിലയിൽ കണ്ടെത്തിയത്.ഉടൻ തന്നെ കാരാഞ്ചിറ മിഷൻ ആശുപത്രിയിൽ എത്തിച്ചെങ്കിലും മരണപ്പെട്ടിരുന്നു.
പോസറ്റ്മോർട്ടം റിപ്പോർട്ട് ലഭിച്ചാൽ മാത്രമേ മരണകാരണം വ്യക്തമാകൂ. കയ്പമംഗലം പൊലീസ് അന്വേഷണം ആരംഭിച്ചു.
