414 ദിവസമായി തുടരുന്ന ചരിത്രപ്രസിദ്ധമായ മുനമ്പം ഭൂസമരം നാളെ അവസാനിക്കും. ഭൂമിക്ക് കരം അടയ്ക്കാൻ താൽക്കാലിക അനുമതി ലഭിച്ച സാഹചര്യത്തിലാണ് സമരം പിൻവലിക്കാൻ ഭൂസംരക്ഷണ സമിതി കോർ ഗ്രൂപ്പ് യോഗം തീരുമാനിച്ചത്.
നാളെ വൈപ്പിൻ എംഎൽഎയും മന്ത്രി പി. രാജീവും സമരപ്പന്തലിലെത്തി സമരക്കാർക്ക് നാരങ്ങാനീര് നൽകി സമരം ഔദ്യോഗികമായി അവസാനിപ്പിക്കും. സ്ഥലം പോക്കുവരവ് ചെയ്യുന്നതിന് തടസ്സമുണ്ടാകില്ലെന്നും, ഇതിനായി കുഴിപ്പിള്ളി വില്ലേജിൽ ഹെൽപ്പ് ഡെസ്ക് തുടങ്ങുമെന്നും കഴിഞ്ഞ ദിവസം നടന്ന ചർച്ചയിൽ മന്ത്രി പി. രാജീവ് ഉറപ്പുനൽകിയിരുന്നു. ഈ ഉറപ്പിന്റെ അടിസ്ഥാനത്തിലാണ് സമരം അവസാനിപ്പിക്കാൻ സമരസമിതി തയ്യാറായത്.
ചെറായി മുനമ്പം പ്രദേശത്തെ ജനങ്ങളുടെ ഭൂമി വഖഫ് ബോർഡ് അവകാശവാദം ഉന്നയിച്ചതിനെത്തുടർന്നാണ് ജനങ്ങൾ സമരരംഗത്തിറങ്ങിയത്. നീണ്ട നാളത്തെ നിയമപോരാട്ടങ്ങൾക്കും ജനകീയ പ്രതിഷേധങ്ങൾക്കുമൊടുവിൽ തങ്ങളുടെ ആവശ്യങ്ങൾ അംഗീകരിക്കപ്പെട്ടതിന്റെ ആശ്വാസത്തിലാണ് മുനമ്പം നിവാസികൾ.
