ഇടുക്കി മൂന്നാറില്‍ വിനോദസഞ്ചാരികള്‍ സ്‌കൈ ഡൈനിംഗില്‍ കുടുങ്ങിയ സംഭവത്തില്‍ പൊലീസ് കേസെടുത്തു. നടത്തിപ്പുകാരായ പ്രവീൺ, സോജൻ എന്നിവർക്കെതിരെയാണ് കേസ്. മനുഷ്യജീവന് അപകടമുണ്ടാക്കുന്ന പ്രവൃത്തികൾ എന്ന കുറ്റത്തിനാണ് കേസെടുത്തിരിക്കുന്നത്. പ്രവര്‍ത്തിച്ചത് മതിയായ സുരക്ഷ ഒരുക്കാതെയാണെന്ന് കണ്ടെത്തി. കഴിഞ്ഞ ദിവസം വൈകീട്ടൊടെയായിരുന്നു ആനച്ചാലിന് സമീപം സ്വകാര്യ സംരംഭകരുടെ സ്‌കൈ ഡൈനിംഗില്‍ വിനോദ സഞ്ചാരികൾ കുടുങ്ങിയത്. മംഗലാപുരം സ്വദേശികളായ മുഹമ്മദ് സഫ്വാൻ, ഭാര്യ തൗഫീന, മക്കളായ ഇവാൻ , ഇനാര ജീവനക്കാരി ഹരിപ്രിയ എന്നിവരാണ് നാലരമണിക്കൂർ 150 അടി ഉയരത്തിൽ കുടുങ്ങി കിടന്നത്. ദേവികുളം സബ് കളക്ടർ ആര്യ വി എം ന്റെ നിർദ്ദേശപ്രകാരം ഫയർഫോഴ്സ് എത്തി റോപ്പ് ഉപയോഗിച്ച് വിനോദ സഞ്ചാരികളെ താഴെ ഇറക്കുകയായിരുന്നു.
