പാലക്കാട് നല്ലേപ്പിള്ളിയില് യുവതിയെ വെട്ടിക്കൊലപ്പെടുത്തി. മാണിക്കത്ത് കളം സ്വദേശിനി ഊര്മിളയാണ് കൊല്ലപ്പെട്ടത്. ജോലിക്കുപോകുന്നതിനിടെ കമ്പിളി ചുങ്കത്തെ പാടത്തിന് സമീപത്താണ് കൊലപാതകം. പരുക്കേറ്റ നിലയില് കണ്ടെത്തിയ ഊര്മിളയെ ആശുപത്രിയിലെത്തിച്ചെങ്കിലും രക്ഷിക്കാനായില്ല. അക്രമിയെ കണ്ടെത്താനായില്ല. കുടുംബപ്രശ്നങ്ങളുള്ളതായി പൊലീസ് പറയുന്നു.
രാവിലെ 6.50 ന് ജോലിക്ക് പോകുന്നതിനായി ഊര്മിള നടന്നുവരുമ്പോഴാണ് ആക്രമണം ഉണ്ടാകുന്നത്. റോഡില് വച്ച് വെട്ടേറ്റതോടെ പാടത്തേക്ക് നീങ്ങിയ യുവതിയെ പിന്നാലെയെത്തി കഴുത്തിലും വെട്ടി പരിക്കേല്പ്പിക്കുകയായിരുന്നു. ആക്രമത്തിന് ശേഷം ആക്രമി ബൈക്കെടുത്ത് സ്ഥലത്തുനിന്നും പോയി. ഭര്ത്താവാണ് യുവതിയെ ആക്രമിച്ചതെന്ന പ്രാഥമിക നിഗമനത്തിലാണ് പോലീസ്. മൂന്നുമാസം മുന്പ് സമാനമായ രീതിയില് വീടിനുള്ളില് കയറി യുവതിയെ കൊലപ്പെടുത്താന് ഭര്ത്താവ് സജീഷ് ശ്രമിച്ചിട്ടുണ്ട്. പോലീസ് അന്ന് വധശ്രമത്തിന് കേസെടുക്കുകയും 50 ദിവസത്തോളം ഇയാള് റിമാന്ഡില് കഴിയുകയും ചെയ്തിട്ടുണ്ട്. തുടര്ന്ന് ജാമ്യത്തില് ഇറങ്ങുകയായിരുന്നു.
അതിരാവിലെയായിരുന്നതുകൊണ്ട് പരിസരത്ത് ആളുകള് കുറവായിരുന്നു. ശബ്ദം കേട്ട് പരിസരവാസി വിനോദ് ഓടിയെത്തുമ്പോള് ഒരു യുവതി വീണുകിടക്കുന്നതും ഒരാള് വെട്ടുന്നതുമായ കാഴ്ചയാണ് കണ്ടത്. ഓടിയെത്തിയപ്പോഴേക്കും പ്രതി ബൈക്കുമെടുത്ത് സ്ഥലത്തുനിന്നും രക്ഷപ്പെടുകയുമായിരുന്നുവെന്ന് വിനോദ് പറഞ്ഞു.
