ഗുണ്ടാ നേതാവും നിരവധി ക്രിമിനൽ കേസുകളിലെ പ്രതിയുമായ മരട് അനീഷ് എന്ന ആനക്കാട്ടിൽ അനീഷിന് വിയ്യൂർ സെൻട്രൽ ജയിലിൽ വധശ്രമം. കൊച്ചിയിലെ തന്നെ നിരവധി ക്രിമിനൽ കേസുകളിലെ പ്രതിയും ഗുണ്ടാ നേതാവുമായ അമ്പായത്തോട് അഷ്‌റഫ്‌ ഹുസൈൻ ആണ് ആക്രമിച്ചത്. ബ്ലേഡ് ഉപയോഗിച്ച് ദേഹത്തും തലയിലും നിരവധി മുറിവേൽപ്പിച്ചു. തടയാനെത്തിയ ജയിൽ ഉദ്യോഗസ്ഥൻ ബിനോയിക്കും മർദനമേറ്റു. അനീഷിനെ മുളംകുന്നത്തുകാവ് ഗവ. മെഡിക്കൽ കോളേജിൽ പ്രവേശിപ്പിച്ചു.
വ്യക്തി വൈരാഗ്യമാണ് അക്രമണത്തിന് പിന്നിലെന്ന് പറയുന്നു. കർണാടക, തമിഴ്നാട് സംസ്ഥാനങ്ങളിൽ കേസുകളുള്ള അനീഷിനെതിരെ കേരളത്തിൽ മാത്രം കൊലപാതകം, തട്ടിക്കൊണ്ടുപോകൽ, വധശ്രമം, ഗുണ്ടാപ്പിരിവ് തുടങ്ങി 45ഓളം കേസുകളുണ്ട്. ഈ മാസം അഞ്ചാം തിയ്യതിയാണ് കൊച്ചിയിൽ ആശുപത്രിയിൽ എത്തിയ അനീഷിനെ ആശുപത്രി വളഞ്ഞ് പൊലീസ് അറസ്റ്റ് ചെയ്തത്. കാപ്പ ചുമത്തിയാണ് വിയ്യൂർ സെൻട്രൽ ജയിലിൽ എത്തിച്ചത്.
