കുങ്കിയാനകൾ മടങ്ങിയതിന് തൊട്ടുപിന്നാലെ തൃശൂർ കുതിരാനിലെ ജനവാസ മേഖലയിൽ വീണ്ടും കാട്ടാനയിറങ്ങി. ഇന്നലെ അർധരാത്രിയോടെയാണ് ഇരുമ്പുപാലം ഫോറസ്റ്റ് സ്റ്റേഷന് സമീപം ഒറ്റയാൻ എത്തിയത്.
പ്രദേശത്ത് നാശനഷ്ടങ്ങളും ഭീതിയും വിതച്ചിരുന്ന ഈ ആനയെ തുരത്തുന്നതിനായാണ് വയനാട്ടിൽ നിന്നും കുങ്കിയാനകളെ എത്തിച്ചിരുന്നത്. രണ്ടാഴ്ചയോളം നീണ്ട ദൗത്യത്തിനൊടുവിൽ, ദൗത്യം പൂർത്തിയാക്കാതെ ഇന്നലെയാണ് കുങ്കിയാനകളെ തിരിച്ചയച്ചത്. ഇതിന് പിന്നാലെയാണ് ഒറ്റയാൻ വീണ്ടും ജനവാസമേഖലയിൽ ഇറങ്ങിയത്.
ആനയെ പൂർണ്ണമായും തുരത്താതെ കുങ്കിയാനകളെ പിൻവലിച്ച വനംവകുപ്പിന്റെ നടപടിയിൽ നാട്ടുകാർക്കിടയിൽ ശക്തമായ പ്രതിഷേധം ഉയർന്നിട്ടുണ്ട്. വന്യമൃഗശല്യം രൂക്ഷമായ പ്രദേശത്ത് സുരക്ഷ ഉറപ്പാക്കാൻ അടിയന്തര നടപടി വേണമെന്നാണ് നാട്ടുകാരുടെ ആവശ്യം.
