താമരശ്ശേരി കട്ടിപ്പാറയിലെ ഫ്രഷ് കട്ട് മാലിന്യ സംസ്കരണ പ്ലാന്റിന് ചുറ്റും 100 മീറ്റർ ചുറ്റളവിൽ കോഴിക്കോട് ജില്ലാ കളക്ടർ നിരോധനാജ്ഞ പ്രഖ്യാപിച്ചു. ഇന്ന് മുതൽ ഏഴ് ദിവസത്തേക്കാണ് നിരോധനാജ്ഞ. നാലോ അതിലധികമോ ആളുകൾ കൂട്ടം കൂടുന്നതിനും പ്രതിഷേധിക്കുന്നതിനും വിലക്കുണ്ട്. താമരശ്ശേരി പോലീസ് സ്റ്റേഷൻ പരിധിയിലെ ഫ്രഷ് കട്ട് പ്ലാന്റ് സ്ഥിതി ചെയ്യുന്ന കട്ടിപ്പാറയിൽ 100 മീറ്റർ ചുറ്റളവിലും, അമ്പായത്തോട്ടിൽ നിന്ന് പ്ലാന്റിലേക്കുള്ള റോഡിന്റെ ഇരുവശത്തുമുള്ള 50 മീറ്റർ ചുറ്റളവിലും, അമ്പായത്തോട് ജംഗ്ഷനിൽ നിന്ന് 100 മീറ്റർ ചുറ്റളവിലുമാണ് നിരോധനാജ്ഞ ഏർപ്പെടുത്തിയിട്ടുള്ളത്.
പ്ലാന്റിന്റെ പ്രവർത്തനാനുമതിക്ക് എതിരെ പ്രദേശവാസികൾ ശക്തമായ പ്രതിഷേധം തുടരുന്ന സാഹചര്യത്തിലാണ് ഈ നടപടി. കഴിഞ്ഞ ദിവസങ്ങളിൽ സമരക്കാർ പ്ലാന്റ് പരിസരത്ത് പ്രതിഷേധിക്കുകയും വാഹനങ്ങൾ കത്തിക്കുകയും ചെയ്തിരുന്നു. പ്രതിഷേധം കൂടുതൽ അക്രമാസക്തമാകുന്നത് തടയുന്നതിനും ക്രമസമാധാനം ഉറപ്പാക്കുന്നതിനുമാണ് ജില്ലാ ഭരണകൂടം നിരോധനാജ്ഞ പുറപ്പെടുവിച്ചത്. നിരോധനാജ്ഞ ലംഘിക്കുന്നവർക്കെതിരെ കർശന നടപടി സ്വീകരിക്കുമെന്ന് പോലീസ് അറിയിച്ചിട്ടുണ്ട്. പ്രദേശവാസികളോട് സമാധാനം പാലിക്കാനും അധികാരികളുമായി സഹകരിക്കാനും നിർദ്ദേശിച്ചിട്ടുണ്ട്.
