കണ്ണൂര്: കണ്ണൂര് ജില്ലാ പഞ്ചായത്ത് മുന് പ്രസിഡന്റ് പി പി ദിവ്യയുടെ മുന്കൂര് ജാമ്യഹര്ജി തള്ളിക്കൊണ്ടുള്ള കോടതി വിധിയുടെ വിശദാംശങ്ങള് പുറത്ത്. ദിവ്യയുടെ നീക്കങ്ങള് മുന്കൂട്ടി ആസൂത്രണം ചെയ്തുകൊണ്ടുള്ളതാണ്. ദിവ്യയുടെ പ്രവൃത്തി പ്രത്യാഘാതം മനസ്സിലാക്കി തന്നെയാണ്. ജാമ്യം നല്കിയാല് അത് തെറ്റായ സന്ദേശമാകുമെന്നും, 38 പേജുള്ള വിധിന്യായത്തില് തലശ്ശേരി പ്രിന്സിപ്പല് സെഷന്സ് കോടതി ജഡ്ജി നിസാര് അഹമ്മദ് വ്യക്തമാക്കി.
ദിവ്യയുടെ പ്രസംഗം എഡിഎമ്മിനെ അപമാനിക്കാനായി ഉദ്ദേശിച്ചിട്ടുള്ളതാണ്. നവീന്ബാബുവിനെ വ്യക്തിഹത്യ നടത്തുക, മാനഹാനി ഉണ്ടാക്കുക ലക്ഷ്യമിട്ട് കരുതിക്കൂട്ടിയാണ് ദിവ്യ യാത്രയയപ്പ് യോഗത്തില് വന്നത്. ഇതിനായി പ്രാദേശിക ചാനല് കാമറാമാനെയും കൂട്ടിയാണ് യോഗത്തിനെത്തിയത്. ഷൂട്ടു ചെയ്ത് വീഡിയോ പ്രചരിപ്പിച്ചു. ഇത് മുന്കൂട്ടി ആസൂത്രണം ചെയ്തുകൊണ്ടു വന്നതാണെന്നതിന് തെളിവാണെന്ന പ്രോസിക്യൂഷന് വാദം കോടതി അംഗീകരിച്ചു.
യാത്രയയപ്പിന് ദിവ്യ എത്തിയത് ക്ഷണിക്കാതെയാണെന്ന പ്രോസിക്യൂഷന് വാദം കോടതി അംഗീകരിച്ചു. ഉന്നത ഉദ്യോഗസ്ഥനെ പൊതുസമക്ഷത്തില് പരിഹസിക്കാനാണ് പ്രതി ശ്രമിച്ചത്. സഹപ്രവര്ത്തകരുടെ മുന്നില് നവീന്ബാബു അപമാനിതനായി. അഴിമതിയെക്കുറിച്ച് അറിവു ലഭിച്ചെങ്കില് പൊലീസിനെയോ വിജിലന്സിനെയോ ആണ് അറിയിക്കേണ്ടിയിരുന്നത്. പ്രതി പി പി ദിവ്യ രാഷ്ട്രീയ സ്വാധീനമുള്ള വ്യക്തിയാണ്. രാഷ്ട്രീയ സ്വാധീനം ഉപയോഗിച്ച് പ്രതി സാക്ഷികളെ സ്വാധീനിച്ചേക്കാം. മുന്കൂര് ജാമ്യം നല്കിയാല് അത് തെറ്റായ സന്ദേശമാകുമെന്നും കോടതി വിധിയില് വ്യക്തമാക്കി.
