പത്തനംതിട്ട പന്തളത്ത് ആൻ്റോ ആൻ്റണി എംപിയുടെ വാഹനത്തിൽ തട്ടിയ കാറില് നാലുഗ്രാം കഞ്ചാവ് .ബഹളം വച്ച് കാർ യാത്രികനായ യുവാവ് പ്രശ്നം ആക്കിയതോടെ പൊലീസെത്തി ഇയാളുടെ കാർ പരിശോധിച്ചപ്പോഴാണ് കഞ്ചാവ് കണ്ടെത്തിയത്.
പന്തളം ജംഗ്ഷനിൽ വച്ചാണ് എംപിയുടെ വാഹനം സിഗ്നൽ കാത്തു കിടന്ന മുന്നിലുണ്ടായിരുന്ന കാറിൽ തട്ടിയത്.ഇതോടെ വണ്ടിയിൽ ഉണ്ടായിരുന്ന പന്നിവിഴ സ്വദേശി ശ്രീജിത്ത് വലിയതോതിൽ ബഹളം വെച്ചു. പെരുമാറ്റത്തിലെ പന്തികേട് തോന്നിയ പൊലീസ് വാഹനം പരിശോധിച്ചപ്പോഴാണ് കാറിൽ നിന്നും കഞ്ചാവ് കണ്ടെടുത്തത്.
ഒപ്പമുണ്ടായിരുന്നയാൾ ഓടി രക്ഷപ്പെട്ടു. കാർ തട്ടിയതോടെ വാഹനത്തിൽ ഉണ്ടായിരുന്നവര് വലിയ ബഹളം ഉണ്ടാക്കി. ഇതോടെ സിഗ്നലിൽ ഉണ്ടായിരുന്ന പൊലീസുകാർ സ്ഥലത്തെത്തി.
പൊലീസുമായി തര്ക്കം ഉണ്ടായതോടെ നടത്തിയ പരിശോധനയിലാണ് കഞ്ചാവ് കണ്ടെത്തിയത്. ഓടി രക്ഷപ്പെട്ടയാൾക്കായി അന്വേഷണം തുടരുകയാണെന്ന് പൊലീസ് അറിയിച്ചു.
