തൃശൂർ പാലിയേക്കരയിലെ ടോൾ പിരിവ് നിരോധിച്ചുകൊണ്ടുള്ള ഉത്തരവ് ഹൈക്കോടതി നീട്ടി. കേസ് പരിഗണിക്കുന്നത് വെള്ളിയാഴ്ചത്തേക്ക് മാറ്റുകയും ചെയ്തു. ടോൾ പിരിവ് തുടരുന്നത് വലിയ ബുദ്ധിമുട്ടുകൾ ഉണ്ടാക്കുന്നില്ല എന്ന വാദം ദേശീയപാത അതോറിറ്റി ഹൈക്കോടതിയിൽ ഉന്നയിച്ചെങ്കിലും, ജനങ്ങളുടെ പ്രശ്നങ്ങൾ പരിഗണിച്ച് ഒരു അന്തിമ തീരുമാനം എടുക്കുന്നത് വരെ ടോൾ പിരിവ് നിർത്തലാക്കാനാണ് ഹൈക്കോടതി ഉത്തരവിട്ടിരിക്കുന്നത്.
5 കിലോമീറ്ററിനുള്ളിൽ താമസിക്കുന്നവരിൽ നിന്ന് ടോൾ പിരിക്കുന്നത് നിയമപരമല്ലെന്നും, ഇത് വലിയ ഗതാഗതക്കുരുക്കിന് കാരണമാകുന്നുവെന്നും ചൂണ്ടിക്കാട്ടി നേരത്തെ തൃശൂർ ജില്ലാ കളക്ടർ ഹൈക്കോടതിയിൽ റിപ്പോർട്ട് സമർപ്പിച്ചിരുന്നു. മണ്ണടിച്ചിൽ ഉണ്ടായ സ്ഥലത്ത് ഇപ്പോഴും അപകടഭീഷണി നിലനിൽക്കുന്നതായും റിപ്പോർട്ടിൽ പരാമർശിച്ചിട്ടുണ്ട്. എന്നാൽ അപകടങ്ങൾ അശ്രദ്ധമായി വാഹനമോടിക്കുന്നതു കൊണ്ടാണെന്നും, 3 ദിവസത്തിനകം ടോൾ നിരക്കിൽ തീരുമാനമെടുക്കാമെന്നും കേന്ദ്ര സർക്കാർ ഹൈക്കോടതിയിൽ വാദിച്ചു.കഴിഞ്ഞ ഓഗസ്റ്റ് 6-നാണ് പാലിയേക്കരയിൽ ടോൾ പിരിവ് നിർത്താൻ ഹൈക്കോടതി ആദ്യമായി ഉത്തരവിട്ടത്. 2 മാസത്തോളമായി ടോൾ പിരിവ് നിർത്തിവച്ചിരിക്കുകയാണ്.
