എറണാകുളം എടയാർ വ്യവസായ മേഖലയിലെ ഓയിൽ കമ്പനിയിലുണ്ടായ വൻ തീപിടിത്തത്തിൽ ഒരാൾ മരിച്ചു. ബിഹാർ സ്വദേശിയായ ശത്രുഘ്നൻ മുഖിയാണ് മരിച്ചത്. അപകടത്തിൽ നിരവധി ജീവനക്കാർക്ക് പൊള്ളലേറ്റു. ഇവരെ സമീപത്തെ വിവിധ ആശുപത്രികളിൽ പ്രവേശിപ്പിച്ചു.
ഇന്ന് രാവിലെ എട്ടരയോടെയാണ് 'പി.ജി ലൂബ്രിക്കന്റ്സ്' എന്ന കമ്പനിയിൽ തീപിടിത്തമുണ്ടായത്. കമ്പനിക്കുള്ളിൽ നിന്ന് വലിയ തോതിൽ കറുത്ത പുക ഉയരുന്നത് കണ്ടതോടെയാണ് നാട്ടുകാരും മറ്റ് തൊഴിലാളികളും വിവരമറിയുന്നത്. നിമിഷങ്ങൾക്കുള്ളിൽ തീ ആളിപ്പടരുകയായിരുന്നു. വിവരം അറിഞ്ഞ ഉടൻ തന്നെ ഫയർഫോഴ്സ് യൂണിറ്റുകൾ സ്ഥലത്തെത്തി രക്ഷാപ്രവർത്തനം ആരംഭിച്ചു.
മണിക്കൂറുകൾ നീണ്ട പരിശ്രമത്തിനൊടുവിലാണ് തീ നിയന്ത്രണവിധേയമാക്കാൻ സാധിച്ചത്. പത്തോളം ഫയർഫോഴ്സ് യൂണിറ്റുകൾ സംയുക്തമായാണ് തീ അണയ്ക്കാൻ ശ്രമിച്ചത്. തീപിടിത്തമുണ്ടായ സമയത്ത് കമ്പനിക്കുള്ളിൽ ജോലിയിലുണ്ടായിരുന്നവർക്കാണ് പരിക്കേറ്റത്. ഇതിൽ ചിലരുടെ പരിക്ക് ഗുരുതരമാണെന്നാണ് റിപ്പോർട്ടുകൾ.
തീപിടിത്തത്തിന്റെ കാരണം ഇതുവരെ വ്യക്തമായിട്ടില്ല. ഷോർട്ട് സർക്യൂട്ടാണോ അതോ മറ്റെന്തെങ്കിലും കാരണമാണോ തീപിടിത്തത്തിലേക്ക് നയിച്ചതെന്ന് പൊലീസ് അന്വേഷിച്ചുവരികയാണ്. അപകടത്തെത്തുടർന്ന് ലക്ഷക്കണക്കിന് രൂപയുടെ നാശനഷ്ടങ്ങൾ ഉണ്ടായതായാണ് പ്രാഥമിക വിലയിരുത്തൽ. എടയാർ മേഖലയിൽ മുൻപും സമാനമായ രീതിയിൽ തീപിടിത്തങ്ങൾ ഉണ്ടായിട്ടുള്ളത് വ്യവസായ മേഖലയിലെ സുരക്ഷാ മാനദണ്ഡങ്ങളെക്കുറിച്ച് വീണ്ടും ആശങ്കയുയർത്തുന്നു.
