സൗദി അറേബ്യയിൽ ഹൂതി വിമതരുടെ ആക്രമണം ശക്തം. ഷൈബ എണ്ണപ്പാടത്തിന് നേരെയും ദമാമിലെ കിങ് ഫഹദ് അന്താരാഷ്ട്ര വിമാനത്താവളത്തിന് നേരെയും ഉണ്ടായ ഡ്രോൺ ആക്രമണത്തിൽ രണ്ടുപേർ കൊല്ലപ്പെട്ടു. സംഭവത്തിൽ നിരവധിപേർക്ക് പരിക്കേറ്റു. കൊല്ലപ്പെട്ടവർ നേപ്പാൾ, ഫിലിപ്പൈൻസ് പൗരന്മാരാണെന്നാണ് വിവരം. പരിക്കേറ്റവരിൽ ഒരു ഇന്ത്യക്കാരനും ഉൾപ്പെടുന്നുണ്ട്.
ഷൈബ എണ്ണപ്പാടത്തിന് നേരെയാണ് ആക്രമണം ഉണ്ടായതെന്നും, ഡ്രോൺ അവശിഷ്ടങ്ങൾ പതിച്ചാണ് ആളപായം ഉണ്ടായതെന്നും റിപ്പോർട്ടുകൾ വ്യക്തമാക്കുന്നു. സരീക് ദീപിനോട് ചേർന്നാണ് ആക്രമണം നടന്നതെന്ന് ഇറാൻ സ്ഥിരീകരിച്ചിട്ടുണ്ട്. കിങ് ഫഹദ് അന്താരാഷ്ട്ര വിമാനത്താവളത്തിന് നേരെയും ആക്രമണം ഉണ്ടായിട്ടുണ്ട്.
ആക്രമണത്തെത്തുടർന്ന് സൗദി സുരക്ഷാസേന ശക്തമായ തിരിച്ചടി നൽകി. ആക്രമണത്തിന് പിന്നിൽ ഹൂതികളാണെന്നും അവർക്ക് നേരെ കനത്ത തിരിച്ചടി നൽകുമെന്നും അധികൃതർ അറിയിച്ചു. ആക്രമണത്തിന്റെ പശ്ചാത്തലത്തിൽ വിമാനത്താവളങ്ങളിൽ കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്. പ്രവാസികൾ ഉൾപ്പെടെ നിരവധി പേർ ആക്രമണത്തെ തുടർന്ന് ആശങ്കയിലാണ്. നേരത്തെയും ഇത്തരത്തിലുള്ള ആക്രമണങ്ങൾ സൗദിയിൽ ഉണ്ടായിട്ടുണ്ട്.
