ജി.എസ്.ടി - നികുതി വെട്ടിപ്പ് കേസുകളില്‍ അറസ്റ്റ് ഒഴിവാക്കാന്‍ ഭേദഗതിയുമായി കേന്ദ്രസര്‍ക്കാര്‍. ഇതിനായുള്ള നിര്‍ദ്ദേശം വരുന്ന 7-ാം തീയതി നടക്കുന്ന ജി.എസ്.ടി കൗണ്‍സില്‍ യോഗത്തില്‍ അവതരിപ്പിക്കും. 2017-ലെ ജി.എസ്.ടി നിയമപ്രകാരം 2 കോടി രൂപയ്ക്ക് മുകളില്‍ നികുതി വെട്ടിപ്പ് നടത്തിയാല്‍ ഉദ്യോഗസ്ഥര്‍ക്ക് അറസ്റ്റ് ചെയ്യാന്‍ അധികാരമുണ്ട്. 2021 മുതല്‍ 2025 വരെയുള്ള കാലയളവില്‍ 72,000-ത്തോളം കേസുകളിലായി 887 അറസ്റ്റുകള്‍ നടന്നു. പുതിയ ഭേദഗതി പ്രകാരം സാധാരണ കേസുകളില്‍ അറസ്റ്റ് ഒഴിവാക്കുകയും, അന്താരാഷ്ട്ര മാനമുള്ള വന്‍കിട തട്ടിപ്പുകളില്‍ മാത്രം അറസ്റ്റ് നിലനിര്‍ത്തുകയും ചെയ്യും. ഈ അറസ്റ്റുകളും ജി.എസ്.ടി നിയമപ്രകാരമായിരിക്കില്ല, പകരം ഭാരതീയ ന്യായ സംഹിതയുടെ അടിസ്ഥാനത്തിലായിരിക്കും നടക്കുക. വ്യാപാരികളില്‍ നിന്നും ചെറുകിട കച്ചവടക്കാരില്‍ നിന്നും ഈ അറസ്റ്റ് നടപടികള്‍ക്കെതിരെ വ്യാപകമായ എതിര്‍പ്പുകള്‍ ഉയര്‍ന്നിരുന്നു. വരാനിരിക്കുന്ന തിരഞ്ഞെടുപ്പുകള്‍ മുന്നില്‍ക്കണ്ട്, ബി.ജെ.പിക്ക് വലിയ സ്വാധീനമുള്ള ഇടങ്ങളില്‍ വ്യാപാരികളുടെയും ഇടത്തരക്കാരുടെയും അതൃപ്തി പരിഹരിക്കുക എന്നതാണ് നീക്കത്തിന് പിന്നിലെ ലക്ഷ്യമെന്നാണ് വിലയിരുത്തല്‍.
