തലസ്ഥാനത്ത് തോക്കും മാരകായുധങ്ങളുമായി യുവാവിനെ പൊലീസ് അറസ്റ്റ് ചെയ്തു. കൊണ്ടോട്ടി സ്വദേശിയായ അജിത്ത് ആണ് പൊലീസിന്റെ പിടിയിലായത്. തിരുവനന്തപുരം റൂറൽ പൊലീസിന്റെ നേതൃത്വത്തിൽ ലഹരി സംഘങ്ങൾക്കെതിരെ നടത്തുന്ന ‘ഓപ്പറേഷൻ തൂഫാൻ’ (Operation Toofan) പ്രത്യേക പരിശോധനയ്ക്കിടയിലാണ് ഇയാൾ പിടിയിലാകുന്നത്.
കൊണ്ടോട്ടി ഭാഗത്ത് വെച്ച് പോലീസിനെ കണ്ടപ്പോൾ സംശയാസ്പദമായ രീതിയിൽ ഓടി രക്ഷപ്പെടാൻ ശ്രമിച്ച അജിത്തിനെ പൊലീസ് പിന്തുടർന്ന് വീട്ടിൽ എത്തി പിടികൂടുകയായിരുന്നു. തുടർന്ന് ഇയാളുടെ മുറിയിൽ നടത്തിയ വിശദമായ പരിശോധനയിലാണ് ഒരു എയർ ഗൺ, വലിയ വാൾ, ഒരു ചെറിയ കത്തി എന്നിവ പോലീസ് കണ്ടെടുത്തത്. പിടിച്ചെടുത്ത എയർ ഗൺ ജാർഖണ്ഡിൽ നിർമ്മിച്ചതാണെന്നാണ് പ്രാഥമിക നിഗമനം. ഇന്നത്തെ പരിശോധനയിൽ ഇയാളുടെ പക്കൽ നിന്നും ലഹരിമരുന്ന് കണ്ടെടുക്കാനായിട്ടില്ല.
അജിത്ത് ലഹരിമരുന്നുകൾ നിരന്തരം ഉപയോഗിക്കുന്ന വ്യക്തിയാണെന്ന് പൊലീസ് സ്ഥിരീകരിച്ചിട്ടുണ്ട്. ഇയാൾക്ക് എം.ഡി.എം.എ ഉൾപ്പെടെയുള്ള സിന്തറ്റിക് ലഹരിമരുന്നുകളുടെ വിൽപ്പനയുമായി ബന്ധമുണ്ടോയെന്ന് പൊലീസ് അന്വേഷിച്ചു വരികയാണ്. കണ്ടെടുത്ത തോക്ക് കൂടുതൽ ശാസ്ത്രീയ പരിശോധനകൾക്കായി ഫോറൻസിക് ലാബിലേക്ക് അയക്കുമെന്നും, ഇതിന് ലൈസൻസ് ആവശ്യമുണ്ടോയെന്ന കാര്യം പരിശോധിച്ച ശേഷം ആംസ് ആക്ട് പ്രകാരം കൂടുതൽ നടപടികൾ സ്വീകരിക്കുമെന്നും പൊലീസ് ഇൻസ്പെക്ടർ സജീവ് എസ്.എസ്. അറിയിച്ചു.
